ఆ యుద్ధ విమానం కూలిపోయింది

నాలుగు రోజుల క్రితం జాడ తెలియకుండా పోయిన యుద్ధ విమానం కూలిపోయినట్టు గుర్తించారు. సాధారణ గస్తీ కోసం మంగళవారం ఉదయం బయలుదేరిన సుఖోయ్ యుద్ధ విమానం రెండు గంటల తరువాత రాడార్‌తో సంబంధాన్ని కోల్పోయింది. చైనా సరిహద్దు ప్రాంతంలో గస్తీ కోసం అసోంలోని తేజ్ పూర్ కు వెళ్లింది ఆ విమానం. దీంతో చైనా కూల్చేసిందేమో అన్న అనుమానాలు కూడా పలువురు వ్యక్తం చేశారు. అయితే చైనా విదేశాంగ శాఖా మంత్రి ఆ యుద్ధ విమానం సంగతి తమకు కూడా తెలియదని చెప్పారు. ఆ విమానాన్ని కనిపెట్టేందుకు చేతనైనంత సాయం చేస్తామని చెప్పారు.

యుద్ధ విమానాన్ని వెతకడం కోసం ప్రత్యేక చాపర్లు కూడా వెళ్లాయి. ఆర్మీకి చెందిన బృందాలు కూడా అరుణాచల్, అసోం రాష్ట్రాల్లో వెతుకులాట మొదలు పెట్టాయి. ఆ వెతుకులాటలో విమానం శకలాలను అరుణాచల్ ప్రదేశ్ అటవీ ప్రాంతంలో కనుగొన్నారు. ఆ విషయాన్ని వైమానిక దళం ప్రకటించింది. విమానం కూలిపోయిందని నిర్దారించింది. అందులో ఉన్న ఇద్దరు పైలెట్లు కూడా మరణించి ఉంటారని భావిస్తున్నారు. వాతావరణం అనుకూలంగా లేక విమానం కూలిపోయి ఉంటుందని అధికారుల భావిస్తున్నారు.