ఎమ్మెల్యే-ఎస్ఐల ప్రేమాయణంపై కలకలం

కర్ణాటకకు చెందిన ఎమ్మెల్యే ఓ మహిళా ఎస్ఐతో ప్రేమాయణం కొనసాగిస్తున్నాడన్న వార్తలు దుమారం రేగాయి. వార్తా ఛానెళ్లలో ఇదే వార్త విస్తృతంగా ప్రచారం అయ్యింది. రాయచూరు రూరల్ ఎమ్మెల్యే తిప్పరాజు హవాల్దార్... బేబి అనే మహిళా ఎస్ఐతో ప్రేమలో ఉన్నాడని, వారిద్దరూ అక్రమసంబంధాన్ని కొన్నినెలలుగా కొనసాగిస్తున్నారని వార్త సారాంశం. భార్యా బిడ్డలు ఉండి, ఒక బాధ్యతాయుతమైన పదవిలో ఉన్న వ్యక్తి ఇలా ఎలా చేస్తున్నాడంటూ మహిళా సంఘాలు దుమ్మెత్తిపోస్తున్నాయి. గత మార్చి 16న ఎమ్మెల్యే భార్య సౌమ్య పేరుతో ఓ లేఖ మహిళా కమిషన్ కు వచ్చింది. అందులో తన భర్త ఎస్ఐతో సంబంధం పెట్టుకుని, తనను మానసికంగా వేధిస్తున్నాడని లేఖలో పేర్కొంది. దీంతో కమిషన్ విచారణ చేపట్టింది.

ఆ లేఖ సారాంశాన్ని కూడా కమిషన్ ఛైర్మన్ మీడియాకు విడుదల చేసింది. అయితే అది తాను రాయలేదని, ఎవరో కావాలనే తన పేరు మీద రాశారని సౌమ్య తెలిపింది. ఎమ్మెల్యే మాట్లాడుతూ... తనకు ఎవరితోనూ అక్రమసంబంధం లేదని, భార్యాభర్తలిద్దరమూ చాలా అన్యోన్యంగా ఉన్నామని చెప్పారు. రాజకీయంగా తమను తొక్కేయడానికే ఎవరో ఇలా చేశారని వారు ఆరోపించారు. ఎస్ఐ బేబీ మాట్లాడుతూ తన పరువుకు నష్టం కలిగించేలా కొంత మంది కుట్ర పన్నారని అన్నారే. త్వరలో పరువు నష్టం దావా వేయనున్నట్టు చెప్పారు.