భీమ్-ఆధార్ యాప్‌ను ఆవిష్కరించిన మోదీ

భారత రాజ్యాంగ నిర్మాత డాక్టర్ బి.ఆర్. అంబేద్కర్ 126వ జయంతి ఉత్సవాల సందర్భంగా ప్రధాన నరేంద్ర మోదీ భీమ్-ఆధార్ అనే బయోమెట్రిక్ పేమెంట్ యాప్ ను ఆవిష్కరించారు. మహారాష్ట్రలోని నాగ్ పూర్ ఆయన శుక్రవారం అంబేద్కర్ జయంతి వేడుకల్లో పాల్గొన్నారు.

భీమ్-ఆధార్ యాప్ తో డిజిటల్ చెల్లింపుల మరింత సులభతరంగా చేసుకోవచ్చని ప్రభుత్వం భావిస్తోంది. నిరక్షరాస్యులు సైతం కేవలం వేలిముద్రతో ఈ యాప్ ద్వారా చెల్లింపులు చేసుకునే వెసులుబాటు ఉంది. నగదు రహిత లావాదేవీలను ప్రొత్సహించుందుకు మోదీ ప్రభుత్వం ఈ యాప్ ను అందుబాటులోకి తెచ్చింది.
ఈ యాప్ ను మోదీ అంబేద్కర్ కు అంకితమిచ్చారు.

ఎన్నో అవమానాలు ఎదుర్కొన్నా... దళిత, బడుగు, బలహీన వర్గాల సంక్షేమం కోసం కృషి చేసిన మహానీయుడు బాబా సాహెబ్ అంబేద్కర్ అని మోదీ కొనియాడారు. ఆయన జీవితంలో చేదు అనుభవాలు ఎన్ని ఉన్నా మనకు మాత్రం అమృతాన్నే పంచారని అన్నారు. వ్యాపారులే వినియోగించే ఈ యాప్ లో వినిగియోగదారులు వేలి ముద్రలతో నగదు చెల్లింపులు చేయవచ్చు. తద్వారా తమ బ్యాంకు అకౌంట్ల నుంచి నగదు వ్యాపారి అకౌంట్లోకి చేరుతుంది.

భీమ్ యాప్ లో భాగంగానే భీమ్-ఆధార్ యాప్ పనిచేస్తుంది. భీమ్ యాప్ ను ఇప్పటికే 1.9కోట్ల మందికి పైగా డౌన్ లోడ్ చేసుకున్నారు. వ్యాపారులకే ఈ యాప్ ఎంతో శ్రేయస్కరమని ప్రభుత్వ వర్గాలు భరోసా ఇస్తున్నాయి.

భీమ్ యాప్ ద్వారా చెల్లింపులను ప్రోత్సహించేందుకు మోదీ శుక్రవారం నగదు వాపస్ పథకం, రిఫరల్ భోనస్ పథకాలను ప్రారంభించారు. ఇందుకోసం ప్రభుత్వం రూ.495కోట్లు కేటాయించింది.