​కేంద్ర కేబినెట్ విస్తరణ.. ఆంధ్రా నుంచి ఛాన్స్ వారికే?

కేంద్ర మంత్రి హోదాలో ఉండిన వెంకయ్యనాయుడు ఉప రాష్ట్రపతి అభ్యర్థిత్వం కోసం రాజీనామా చేశారు. మరి కాసేపటిలో వైస్ ప్రెసిడెంట్ పదవికి నామినేషన్ దాఖలు చేయనున్న ఆయన ఇప్పటికే రాజీనామా పత్రాన్ని అందించేశారు. ఇక ఇది వరకూ మనోహర్ పారికర్ చేత కేంద్రమంత్రి పదవికి రాజీనామా చేయించి గోవా ముఖ్యమంత్రిగా పంపారు. ఆయన నిర్వర్తించిన రక్షణ శాఖను ఆర్థిక శాఖ మంత్రి అరుణ్ జైట్లీకి అదనపు బాధ్యతగా అప్పగించారు. ఇలాంటి నేపథ్యంలో.. అతి త్వరలో కేంద్ర కేబినెట్ విస్తరణ తప్పదని స్పష్టం అవుతోంది.

వెంకయ్య, పారికర్ లు నిర్వర్తించిన శాఖలను వేరే వాళ్లకు అప్పగించడంతో పాటు.. మరి కొన్ని మార్పుచేర్పులను కూడా చేయాలని ప్రధాని మోడీ భావిస్తున్నట్టుగా తెలుస్తోంది. ఎన్నికలకు సమయం దగ్గర పడుతున్న నేపథ్యంలో.. మార్పు చేర్పుల ద్వారా ఎన్నికలను ఎదుర్కొనడానికి తగిన కేబినెట్ ను రెడీ చేయాలని మోడీ భావిస్తున్నారని సమాచారం.

ప్రస్తుతం మొదలైన పార్లమెంట్ సమావేశాల అనంతరం కేబినెట్ విస్తరణ ఉంటుందని తెలుస్తోంది. ఆసక్తిదాయకమైన అంశం ఏమిటంటే.. విస్తరణలో ఏపీ నేతలకు ప్రాతినిధ్యం లభించే అవకాశాలు ఉండటం. వెంకయ్యనాయుడు రాజస్తాన్ నుంచి రాజ్యసభకు నామినేట్ అయినప్పటికీ.. తెలుగువారు కాబట్టి, ఆయన స్థానంలో మరో తెలుగు వ్యక్తికే కేంద్రమంత్రి బాధ్యతలు లభించే అవకాశాలున్నాయి. ఈ అవకాశం విషయంలో ఇప్పటికే తెలుగుదేశం పార్టీ ప్రయత్నాలు మొదలుపెట్టినట్టు సమాచారం.

వెంకయ్యకు ప్రత్యామ్నాయంగా తమ పార్టీ ఎంపీ ఒకరికి కేంద్రమంత్రి పదవి బాధ్యతలు ఇవ్వాలని కేంద్ర ప్రభుత్వ పెద్దలను బాబు కోరినట్టుగా తెలుస్తోంది. అయితే బీజేపీ మాత్రం వేరే ఆలోచనతో ఉందనే ప్రచారమూ జరుగుతోంది. ఏపీ నుంచి ఎన్నికైన బీజేపీ ఎంపీల్లో ఒకరికి కేంద్రమంత్రి పదవిని ఇవ్వాలని కమలం పార్టీ భావిస్తోందట. తద్వారా ఏపీలో తమ పార్టీని బలోపేతం చేసుకోవాలని అనుకుంటున్నారట కమలనాథులు. ఛాన్స్ దక్కేదెవరికైనా.. అది ఏపీకి చెందిన నేతకే అని స్పష్టం అవుతోంది! మరి అదెవరో?