అండమాన్ నికోబార్ దీవులని తాకిన రుతుపవనాలు

ఇంకా ఎన్నిరోజులు ఈ ఎండ వేడిమి భరించాలా అని రుతు పవనాల కోసం ఎదురుచూస్తున్న జనానికి, మళ్లీ పంటలు పండించడానికి ఆకాశం వైపు చూసే రైతన్నలకి భారత వాతావరణ శాఖ ఓ తీపి కబురు వినిపించింది. సాధారణంగా ప్రతీ సంవత్సరం మే 20వ తేదీ తర్వాతే రుతుపవనాలు అండమాన్ నికోబార్ దీవుల్లోకి ప్రవేశించడం జరుగుతుంది. కానీ ఈసారి ఎప్పటికన్నా ఆరు రోజుల ముందుగానే నైరుతి రుతుపవనాలు అండమాన్‌ దీవులని తాకాయి.

ఈ రుతుపవనాలు రానున్న 72 గంటల్లో నైరుతి బంగాళాఖాతంలోకి ప్రవేశించే అవకాశం ఉందని వాతావరణ శాఖ తెలిపింది. 48 గంటల్లో అండమాన్ నికోబార్ దీవుల్లో అల్పపీడనం ఏర్పడే అవకాశాలు వున్నాయని ప్రకటించిన వాతావరణ శాఖ.. రానున్న మూడు రోజుల్లో ఎండ తీవ్రత మాత్రం మరింత పెరిగే అవకాశం లేకపోలేదని ఈ ప్రకటనలో పేర్కొంది.