ఎయిర్‌పోర్టుల్లో భద్రతపై సీఐఎస్ఎఫ్‌కు ఐబీ హెచ్చరిక?

ఐఎస్, అల్‌ఖైదా, పాకిస్థాన్‌కు చెందిన లష్కరే తొయిబా, జైషే మహ్మద్‌ ఉగ్రవాద సంస్థలు దాడులు, విమానాలకు హైజాక్‌కు పాల్పడే అవకాశం ఉందని గతంలో ఇంటెలిజెన్స్ వర్గాలు హెచ్చరికలు జారీ చేశాయి. దీంతో దేశవ్యాప్తంగా ఉన్న అత్యంత సున్నితమైన ప్రాంతాల్లోని విమానాశ్రయాల్లో ఆకస్మిక తీవ్రవాద నిరోధక ప్రణాళికలను చేపట్టాలని సెంట్రల్ ఇండస్ట్రియల్ సెక్యూరిటీ ఫోర్స్‌‌కు ఐబీ సూచించింది.

ఈ ప్రణాళికలో భాగంగా ఎయిర్‌పోర్ట్‌తో అనుసంధానమైన రోడ్లు, లోనికి వెళ్లేవారితోపాటు బయటకు వచ్చే సందర్శకులు, ప్రయాణికులను సీఐఎస్ఎఫ్‌కు చెందిన సిబ్బంది క్షుణ్ణంగా పరిశీలిస్తారు. అయితే కేవలం ఢిల్లీ, ముంబయి ఎయిర్‌పోర్టుల్లోనే దీన్ని అమలు చేయడం గమనార్హం. దేశంలో అత్యంత సమస్యాత్మక విమానాశ్రాయాల్లో భద్రత కోస ప్రణాళిక రూపొందిచామని, ప్రభుత్వ అనుమతి కోసం ఎదురుచూస్తున్నట్లు సీఐఎస్ఎఫ్ వర్గాలు పేర్కొంటున్నాయి.

నిఘా వర్గాల తాజా సమాచారం ప్రకారం అంతర్జాతీయ తీవ్రవాద సంస్థలు, ఖలిస్థాన్ ఉగ్రవాదులు కూడా దేశంలోని విమానాశ్రయాలను లక్ష్యంగా చేసుకున్నట్లు తెలుస్తోంది. ఇటీవల యూరప్‌లో జరగుతున్న వరుస దాడులే విమానాశ్రయాల్లో భద్రత కట్టుదిట్టం కోసం నిఘా వర్గాలు హెచ్చరించడానికి ప్రధాన కారణం. ట్రాన్స్‌పోర్ట్, టూరిస్ట్, కల్చర్ విభాగానికి చెందిన పార్లమెంటరీ స్టాండింగ్ కమిటీ కూడా పఠాన్‌కోట్ ఉగ్రదాడి తర్వాత దేశంలో 20 అంతర్జాతీయ విమానాశ్రయాలకు ముప్పు పొంచి ఉన్నట్లు పేర్కొంది.


దేశంలోని 98 విమానాశ్రయాల్లో అత్యంత ప్రమాదకరమైన జాబితాలో 26 ఉన్నాయి. వీటిలో 18 సీఐఎస్ఎఫ్ జవాన్లు పరిరక్షిస్తుండగా, మిగతావి పోలీస్ ఫోర్స్ అధ్వర్యంలో ఉన్నాయి. అలాగే 56 సున్నితమైన విమానాశ్రాయలుంటే 37 సీఐఎస్ఎఫ్ భద్రతా వలయంలో ఉన్నాయి. సీఐఎస్ఎఫ్ ప్రతిపాదనలను కేంద్ర హోం శాఖ, పౌర విమానయాన శాఖ పరిశీలిస్తున్నాయని అధికారులు తెలిపారు. ఇటీవలే మధ్యప్రదేశ్‌లోని జబల్‌పూర్, గుజరాత్‌లోని జామ్‌నగర్ ఎయిర్‌పోర్టులను కేంద్రం సీఐఎస్ఎఫ్ పరిధికి అప్పగించింది.