అఖిలేష్ ‘బలానికి’ జడిసిన ములాయం

ఎస్పీ అధినేత ములాయం సింగ్ యాదవ్ తనయుడు అఖిలేష్ యాదవ్ బలప్రదర్శనకు జడిశారు. అఖిలేష్ యాదవ్ ను పార్టీ నుంచి ములాయం బహిష్కరించి 24గంటలు గడవకముందే కొడుకును పిలిచి మళ్లీ కలిసిపోయారు.

బహిష్కరణ- ఎత్తివేతల మధ్య ఎన్నో ట్విస్టులు, బలప్రదర్శనలు చోటుచేసుకున్నాయి. తండ్రి బహిష్కరణ వేటు వేసినప్పటి నుంచి మరో బాబాయ్ రాంగోపాల్ యాదవ్ తో కలిసి తిరుగుబాటుకు సిద్ధమయ్యారు.

శనివారం ఉదయం దాదాపు 210 మంది ఎమ్మెల్యేలు, ఎమ్మెల్సీలు, ఎంపీలతో అఖిలేష్ తన నివాసంలో సమావేశమయ్యారు. అఖిలేష్ యాదవ్ కు మద్దతుగా రాష్ట్రవ్యాప్తంగా యువకులు పెద్దఎత్తున ర్యాలీలు..ములాయం తమ యువనేతపై విధించిన బహిష్కరణ వేటును నిరసిస్తూ ప్రదర్శనలు చకచకగా జరిగిపోయాయి.


తన వర్గ నేతలతో సమావేశం ఏర్పాటుచేసిన ములాయం, శివపాల్ అనుచరులతో అఖిలేష్ వర్గ నేతలు కొట్లాటకు దిగారు.

ఇంకోవైపు ‘రాష్ట్రీయ సమాజ్ వాదీ’పేరుతో కొత్తపార్టీ ప్రకటించి..మోటార్ సైకిల్ ను గుర్తుగా ఎంచుకుంటానని ఒకవర్గం చేత....మెజార్టీ ఎమ్మెల్యేలు తనవైపు ఉన్నందున అసలైన ఎస్పీ తనదేనని ప్రకటించేందుకు సిద్ధమయ్యారనే ఫీలర్స్ అఖిలేష్ ఇప్పించడంలో సక్సెస్ అయ్యారు.

అటు ములాయం సింగ్ మిత్రుడు, ఆర్జేడీ అధినేత లాలూ ప్రసాద్ యాదవ్ రంగంలోకి దిగారు. పార్టీ చీలిపోతే మతతత్వ శక్తులకు అవకాశమిచ్చినట్లు అవుతుందని తండ్రీకొడుకులకు ఫోన్ చేసి హెచ్చరించారు.

దీనికితోడు అఖిలేష్ కు వస్తున్న ఆదరణను తట్టుకునేందుకు, అంతే ధీటుగా క్యాడర్, ప్రజలను ఆకర్శించే నేత ములాయంకు కరువయ్యారు.
గంటల వ్యవధిలో చోటు చేసుకున్న ఈ పరిణామాలకు ములాయం మెత్తపడ్డారు. తమ్ముడు శివపాల్, మరికొంత మంది సీనియర్లతో చర్చించి అఖిలేష్, రాంగోపాల్ లను తిరిగిపార్టీలో చేర్చుకోవాలని నిర్ణయించుకున్నారు. వెంటనే అఖిలేష్ కు కబురు పంపారు.
అప్పటికే తన వర్గ నేతలతో సమావేశంలో ఉన్న అఖిలేష్...అటు నుంచి అటే తండ్రి ములాయం నివాసానికి వెళ్లి కలిశారు. బహిష్కరణ ఎత్తివేస్తున్నామని, కలిసి పని చేద్దామని...విబేధాలు మాని పార్టీ గెలుపుకోసం కృషి చేయాలని అఖిలేష్ కు చెప్పండతో ఫ్యామిలీ వార్ కు తెరపడింది.

అయినప్పటికీ..ఈ వివాదం ఇంతటితో సమసిపోతుందని అనుకోవడానికి వీలులేదు. ఎందుకంటే తనను సీఎం క్యాండిడేట్ గా ముందే అఖిలేష్ షరతు విధిస్తున్నారు. అలా చేస్తే తమ పరిస్థితి ఏంటనీ తమ్ముడు శివపాల్ యాదవ్, చిన్న కోడలు అపర్ణా యాదవ్ లు ములాయంను నిలదీసే అవకాశం ఉంది. ఇవన్నీ కుదిరినా..ఫ్యామిలీ గొడవలతో క్యేడర్ ను గందరగోళ పరిచిన ఎస్పీ వచ్చే ఎన్నికల్లో అధికారం చేజిక్కించుకోవడం అనుమానమే.