బిడ్డా, కనీసం ఈ ఒక్క మాటైనా విను జర!

కొడుకుతో పంతానికిపోయి...తెగేదాకా లాగిన ఎస్పీ వ్యవస్థాపకులు ములాయం సింగ్ యాదవ్ సైకిల్ గుర్తు జార విడుచుకున్నాక మెత్తబడ్డారు. చేసేది లేక కొడుకుతో సయోధ్యకు దిగారు.

ఎన్నికల సంఘం సైకిల్ గుర్తును అఖిలేష్ కు కేటాయించాక..ఆయన తండ్రి ములాయంను కలిశారు. ఈ సందర్భంగా 38 మంది ఆశావాహుల పేర్లతో కూడిన జాబితాను ములాయం అఖిలేష్ కు అందించారు. ఏళ్ల తరబడి వాళ్లు తననే నమ్ముకున్నారని, కనీసం వారికి సీట్లు కేటాయించాలని ములాయం అఖిలేష్ ను రిక్వెస్ట్ చేసినట్లు సమాచారం.

అయితే ఈ లిస్టులో తమ్ముడు శివపాల్ యాదవ్ పేరు ఉందా లేదా అన్నతి తెలియరాలేదు. ఒక వేళ ఉంటే ఆయనకు అఖిలేష్ టిక్కెట్ కేటాయిస్తారా అన్నది ఆసక్తిగా మారింది.

శివపాల్ తన కొడుకు ఆదిత్యతో పాటు ములాయం రెండో భార్య సాధన కోడలు అపర్ణలతో కూడి ఈసారి పోటీ చేయించాలని భావించారు. ఈ సమయంలోనే ఎస్పీలో చీలిక రావడం, మెజార్టీ నేతలు, సైకిలు గుర్తు అఖిలేష్ కు దక్కడంతో ఈసారి ఎవరెవరికీ సీట్లు దక్కుతాయో తెలియని పరిస్థితి.

అయితే ఎస్పీ అధ్యక్షుడిగా తన వర్గం నేతలతో ఎన్నికచేయించుకున్నప్పటి నుంచి అఖిలేష్ తండ్రి ములాయంను ఒక్కమాట కూడా అనలేదు. ఒకవైపు సైకిల్ గుర్తు కోసం పోరాటం చేస్తూనే తండ్రిని కలుస్తూ వచ్చారు. ఎస్పీకి ములాయమే మార్గదర్శి అని కూడా ప్రకటిస్తూ వచ్చారు.

ఈ నేపథ్యంలో తండ్రి సూచించిన 38 మంది అభ్యర్థుల్లో చాలామాందికి అవకాశం ఇచ్చి తండ్రి మాట వినే కొడుకుగా అనిపించుకోవాలని అఖిలేష్ భావిస్తున్నారు.

కాగా, ఎస్పీలో తలెత్తిన వివాదమంతా తండ్రీకొడుకులు ఆడిన డ్రామాగా రాజకీయ విశ్లేషకులు విమర్శిస్తున్నారు.