7 కార్లు ఢీ.. తమిళనాడులో ఘోర రోడ్డు ప్రమాదం, రహదారి రక్తసిక్తం

తమిళనాడులోని పుదుక్కొట్టై - తిరుచ్చి రహదారిపై ఘోర రోడ్డు ప్రమాదం చోటుచేసుకుంది. ఒకదాని వెంట ఒకటిగా వస్తున్న ఏడు కార్లు ఢీకొన్నాయి. ఈ ప్రమాదంలో ఐదుగురు వ్యక్తులు అక్కడికక్కడే మృతి చెందారు. మరో 21 మంది గాయపడ్డారు. వీరిలో ఏడుగురి పరిస్థితి విషమంగా ఉంది. గాయపడిన వారిని సమీప ఆస్పత్రికి తరలించి చికిత్స అందిస్తున్నారు.

పుదుక్కొట్టై - తిరుచ్చి మధ్య నార్తామలై రైల్వే పాలిటెక్నిక్ కళాశాల ఎదురుగా బుధవారం (ఆగస్టు 7) సాయంత్రం ఈ ప్రమాదం చోటుచేసుకుంది. ప్రమాద విషయం గుర్తించగానే కొంత మంది స్థానికులు, వాహనదారులు సహాయ చర్యలు చేపట్టారు. పోలీసులకు సమాచారం అందించారు.

Read Also: వరంగల్ నిట్‌ను వెంటాడుతున్న ఆత్మహత్యలు.. క్యాంపస్‌కు ఏమైంది?

వీడియో: ప్రమాదం దృశ్యాలు..
తిరుచ్చి నుంచి వెళుతున్న ఓ కారు టైర్ ఒక్కసారిగా పంక్చరై పేలిపోవడంతో అదుపుతప్పి ఎదురుగా వస్తున్న కారును ఢీకొట్టిందని ప్రత్యక్ష సాక్షులు చెబుతున్నారు. దీంతో ఆ కార్ల వెనకాల వస్తున్న మరో ఐదు వాహనాలు పరస్పరం ఢీకొని ఘోర ప్రమాదం చోటుచేసుకుంది. ప్రమాదం జరిగిన సమయంలో వాహనాలన్నీ 100 kmph కంటే పైగా వేగంతో ప్రయాణిస్తున్నట్లు తెలుస్తోంది.
Read Also: మహిళా ఖైదీపై కానిస్టేబుల్ అత్యాచారం

రోడ్డుపై చెల్లాచెదురుగా పడి ఉన్న మృతదేహాలు, బాధితుల ఆర్తనాదాలతో ప్రమాదస్థలి భీతావహంగా మారింది. ప్రమాద తీవ్రతకు కార్లు నుజ్జు నుజ్జయ్యాయి. సమాచారం అందుకున్న అధికారులు ఘటనా స్థలికి వచ్చి సాయ కార్యక్రమాలు చేపట్టారు.