ముంబై ఎయిర్‌పోర్ట్ వరల్డ్ రికార్డ్

ముంబై ఎయిర్‌పోర్ట్ సరికొత్త రికార్డ్‌ను సొంతం చేసుకుంది. విమానాల రాకపోకలతో బిజీగా ఉండే ఈ విమానాశ్రయం తన పాత రికార్డ్‌ను తిరగరాసింది. 24 గంటల్లో ఏకంగా 980 ఫ్లైట్ల రాకపోకలతో చరిత్రను సృష్టించింది. ఈ విషయాన్ని ఎయిర్‌పోర్ట్ అధికారులు అధికారికంగా ప్రకటించారు. ఎయిర్‌ ట్రాఫిక్‌ కంట్రోల్‌ సిబ్బంది సమన్వయం... ఓ ప్లాన్ ప్రకారం ముందుకు సాగడంతో... ఇది సాధ్యమైందంటున్నారు. ఎప్పుడూ రన్ వే రద్దీగా ఉన్నా... విమానాలకు ఎలాంటి ఇబ్బందులు లేకుండా జాగ్రత్తలు తీసుకోవడం కూడా గొప్ప విషయమనే చెప్పాలి.

2006 ముందు వరకు గంటకు 30 విమానాలు వచ్చేవి. ఆ తర్వాత అత్యాధునిక రాడార్ వ్యవస్థతో పరిస్థితి మారిపోయింది. రద్దీ సమయంలో గంటకి దాదాపు 55 విమానాలు వచ్చి వెళ్లే కెపాసిటీ ఉంది. మామూలు సమయాల్లో అయితే ఈ సంఖ్య 52 ఉంటుందంటున్నారు. ఇప్పుడైతే రద్దీ సమయాల్లో 48 ఫ్లైట్ సర్వీసులు రాకపోకలు సాగిస్తున్నారు. అంతేకాదు గతంలోనే ముంబై ఎయిర్‌పోర్ట్ ఈ అరుదైన రికార్డును దక్కించుకుంది. డిసెంబర్‌లో 974 విమానాలతో వరల్డ్ రికార్డును సృష్టించింది. ఇప్పుడు మళ్లీ దాన్ని బ్రేక్ చేసింది.