ముంబై రైల్వేస్టేషన్‌లో తొక్కిసలాట.. 22 మంది మృతి

దేశ ఆర్థిక రాజధాని ముంబయిలో పెను విషాదం చోటుచేసుకుంది. స్థానిక ఎల్ఫిన్‌స్టోన్‌ రైల్వేస్టేషన్‌ వద్ద ప్రయాణికులు నడిచే వంతెనపై తొక్కిసలాట జరిగింది. ఈ ఘటనలో 22 మంది మృతి చెందగా.. 50 మందికి పైగా గాయపడ్డారు. ఈ స్టేష‌న్‌లో లోకల్‌ ట్రెయిన్లు ఎక్కువగా ఆగుతుంటాయి. భారీ వర్షం కారణంగా ఒక్కసారిగా జనం లోపలికి దూసుకురావడంతో ఈ ప్రమాదం జరిగిందని అధికారులు పేర్కొన్నారు. ఉదయం 10.30 ప్రాంతంలో చోటుచేసుకున్న ఈ ఘటనపై సమాచారమందుకున్న పోలీసులు, వైద్యులు, రైల్వే సిబ్బంది హుటాహుటీన రైల్వేస్టేషన్‌కు చేరుకుని సహాయకచర్యలు చేపట్టారు. క్షతగాత్రులను వైద్యం కోసం ఆస్పత్రికి తరలించారు. మరోవైపు ఈ ప్రమాదంపై రైల్వే శాఖ మంత్రి పియూష్ గోయల్ దిగ్భ్రాంత్రి వ్యక్తం చేశారు. క్షతగ్రాతులను పరామర్శించేందుకు ఆయన ఘటనాస్థలికి బయలుదేరారు.

ఈ తొక్కిసలాటకు భారీ వర్షంతోపాటు పండగ రద్ధీ కూడా కారణమని రైల్వే అధికారులు ప్రకటించారు. ఆఫీసుకు వెళ్లే సమయం కావడం, పండగకు స్వంత ఊళ్లకు వెళ్లేవారితో రైల్వే‌స్టేషన్ కిక్కిరిసి ఉంది. ఈ సమయంలో భారీ వర్షం కురవడంతో ఒక్కసారిగా జనం లోనికి చొచ్చుకువచ్చారని అధికారులు పేర్కొన్నారు. సహాయక చర్యలు కొనసాగుతున్నాయని తెలిపారు.