కాస్మెటిక్ షాపులో అగ్ని ప్రమాదం.. చిన్నారితో పాటు తల్లి సజీవదహనం

దేశ ఆర్థిక రాజధాని ముంబైలో అగ్ని ప్రమాదం మరోసారి తీవ్ర విషాదాన్ని నింపింది. నవీ ముంబై ప్రాంతంలోని ఎయిరోలి ప్రాంతంలోని ఓ కాస్మెటిక్ షాపులో చెలరేగిన మంటల కారణంగా 25 ఏళ్ల ఓ మహిళతో పాటు ఆమె అయిదేళ్ల కూతురు అగ్నికి ఆహుతయ్యారు. ప్రమాదం నుంచి ఆమె భర్త మరో ఇద్దరు పిల్లలు సురక్షితంగా బయటపడ్డారు. ప్రమాదం జరిగిన సమయంలో ఆ కుటుంబం నిద్రిస్తోంది. గ్రౌండ్ ఫ్లోర్‌లో ఉన్న కాస్మెటిక్ షాపులో జరిగిన అగ్ని ప్రమాదం కారణంగా ఎగసిపడ్డ మంటలు ఫస్ట్ ఫ్లోర్‌లో ఉన్న ఇంట్లోకి వ్యాపించడంతో ఈ విషాదం చోటు చేసుకుంది.

సమాచారం అందుకున్న అగ్నిమాపక సిబ్బంది ఘటనా స్థలికి చేరుకొని మంటలను అదుపులోకి తీసుకొచ్చారు. ఇంటి యజమానితో పాటు మరో ఇద్దరు పిల్లలను సురక్షితంగా కిందకు తీసుకొచ్చారు. షార్ట్ సర్క్యూట్ కారణంగా అగ్ని ప్రమాదం జరిగి ఉంటుందని అధికారులు భావిస్తున్నారు.