ముంబైలో మరోసారి భారీ అగ్నిప్రమాదం..

దేశ ఆర్థిక రాజధాని ముంబైని అగ్నిప్రమాదాలు వణికిస్తూనే ఉన్నాయి. నగరంలోని ఎస్‌వీ రోడ్డులో.. ఓ కలప దుకాణంలో మంగళవారం (జనవరి 9) సాయంత్రం భారీ అగ్ని ప్రమాదం సంభవించింది. ఈ ప్రమాదంలో ఆరుగురు వ్యక్తులు గాయపడినట్లు సమాచారం. వెంటనే అప్రమత్తమైన అగ్నిమాపక సిబ్బంది మంటలను అదుపులోకి తీసుకొచ్చారు. ప్రమాదానికి కారణం తెలియాల్సి ఉంది.
గత 15 రోజుల వ్యవధిలో ఇది పదో ప్రమాదం కావడం గమనార్హం. ఇటీవల కమలా మిల్స్ రెస్టారెంట్‌లో జరిగిన అగ్ని ప్రమాదంలో పుట్టిన రోజు వేడుకల్లో మునిగితేలిన 14 మంది దుర్మరణం పాలైన సంగతి తెలిసిందే. ఆ తర్వాత రెండు రోజులకే మరో అగ్ని ప్రమాదంలో నలుగురు వ్యక్తులు మృత్యువాతపడ్డారు.
జనవరి 6న సాయంత్రం సినీవిస్టా స్టూడియోలో మరోసారి భారీ అగ్ని ప్రమాదం చోటు చేసుకుంది. ఆ సమయంలో ‘బెపనాచ్’ (కలర్స్), ‘హాసిల్’ (సోనీ టీవీ) కార్యక్రమాలకు సంబంధించిన షూటింగ్‌లతో స్టూడియో కిక్కిరిసిపోయింది. అయితే.. ఈ ఘటనలో ఎవరికీ ఎలాంటి ప్రమాదం వాటిల్లకపోవడంతో అధికారులు ఊపిరి పీల్చుకున్నారు.