వదలని వాన.. వణికిపోతున్న ముంబై, ఎటు చూసినా నీళ్లే!

ఎటు చూసినా నీళ్లే. అడుగు బయటపెట్టే పరిస్థితి లేదు. ఏదైనా అవసరం పడి బయటకి వచ్చారంటే.. వరద నీటిలో కొట్టుకుపోయి ఎక్కడ తేలుతారో తెలియదు. దేశ వాణిజ్య రాజధాని ముంబైలో ప్రస్తుత పరిస్థితి ఇది. గత 5 రోజులుగా అక్కడ ఎడతెరిపి లేకుండా వానలు కురుస్తున్నాయి. దీంతో నగరం మొత్తం జలమయమైంది. లోతట్టు ప్రాంతాలలోని ఇళ్లు నీట మునిగాయి. వరదలకు పలు ఇళ్లు ధ్వంసమయ్యాయి. భారీ వర్షంతో పాటు గంటలకు 100 కి.మీ. కంటే అధిక వేగంతో గాలులు వీస్తున్నాయి. దీంతో ముంబై నగరం చిగురుటాకులా వణుకుతోంది.

దక్షిణ ముంబైలోని కొలాబా ప్రాంతంలో గడిచిన 24 గంటల వ్యవధిలో 331.8 మిల్లీమీటర్ల వర్షపాతం నమోదైంది. ముంబైలో గత 46 ఏళ్లలో ఆగస్టు నెలలో.. ఒక్కరోజులో ఈ స్థాయిలో వర్షపాతం నమోదవడం ఇదే తొలిసారని అధికారులు తెలిపారు. ఆగస్టు నెల సరాసరి వర్షపాతంలో దాదాపు 64 శాతం వర్షం ఈ ఐదు రోజుల వ్యవధిలోనే నమోదైందని వారు వెల్లడించారు.

భారీ వర్షాలకు సిద్ధి వినాయక ఆలయ సమీపంలోని ప్రభాదేవి అపార్టుమెంట్ నాలుగంతస్తుల భవనం కొంత భాగం కూలిపోయి రోడ్డు పైన పడింది. తీరంలో అలలు ఎగిసిపడుతున్నాయి. ముంబైతో పాటు థానే, పాల్‌గఢ్, రాయ్‌గఢ్, కొల్హాపూర్, రత్నగిరి, సతారా ప్రాంతాల్లోనూ భారీ వర్షాలు కురుస్తున్నాయి. వాగులు, వంకలు పొంగి పొర్లుతున్నాయి.

మహారాష్ట్ర ప్రభుత్వం ముంబైలో ఇప్పటికే సబర్బన్‌ రైలు, బస్సు సేవలను నిలిపివేసింది. అత్యవసర సేవలు మినహా అన్ని కార్యాలయాలను మూసివేసినట్లు తెలిపింది. ప్రజా జీవనం పూర్తిగా స్తంభించిపోయింది. అత్యవసరమైతే తప్ప బయటకు ఎవరూ రావద్దని ప్రజలను సీఎం ఉద్ధవ్ థాక్రే కోరారు.

మరోవైపు.. రానున్న 24 గంటల్లో భారీ వర్షాలు కురుస్తాయని వాతావరణ శాఖ హెచ్చరించింది. మూడు రోజుల పాటు వర్షాలు కొనసాగుతాయని తెలిపింది. ముంబై వాసులను ఇది మరింత ఆందోళనకు గురిచేస్తోంది. ముంబై, పరిసర ప్రాంతాల్లో నెలకొన్న పరిస్థితులకు సంబంధించి మహారాష్ట్ర ముఖ్యమంత్రికి అన్ని విధాలా సహకరిస్తామని ప్రధాని నరేంద్ర మోదీ బుధవారం హామీ ఇచ్చారు.

Also Read: కరోనా విజేతల్లో ఊపిరితిత్తుల సమస్యలు..