వారందరి కన్నా మా అమ్మే గొప్ప ఇండియన్: రాహుల్ గాంధీ

యూపీఏ అధ్యక్షురాలు సోనియా గాంధీ ఇటలీ దేశస్థురాలు అంటూ కర్ణాటక అసెంబ్లీ ఎన్నికల ప్రచారంలో ప్రధానమంత్రి నరేంద్ర మోదీ చేసిన వ్యాఖ్యలపై కాంగ్రెస్ అధ్యక్షుడు రాహుల్ గాంధీ కౌంటర్ ఇచ్చారు. ‘మా అమ్మ ఒక ఇటాలియన్. కానీ ఆమె అత్యధిక కాలం ఇండియాలోనే జీవించారు. నేను చూసిన చాలా మంది కన్నా మా అమ్మే గొప్ప ఇండియన్’ అని రాహుల్ గాంధీ స్పందించారు. కర్ణాటక ఎన్నికల ప్రచారంలో ఉన్న ఆయన గురువారం బెంగళూరులో మీడియాతో మాట్లాడారు. ఎన్నికల ప్రచారంలో తనపై, సోనియా గాంధీపై నరేంద్ర మోదీ పదేపదే విమర్శలు చేయడంపై రాహుల్ తీవ్రస్థాయిలో ధ్వజమెత్తారు.

2019 ఎన్నికల్లో కాంగ్రెస్ అతిపెద్ద పార్టీగా అవతరిస్తే తానే ప్రధానమంత్రిని అవుతానని రాహుల్ గాంధీ ప్రకటించిన విషయం తెలిసిందే. ఈ ప్రకటన చేసినప్పటి నుంచి రాహుల్ గాంధీపై నరేంద్ర మోదీ విమర్శలు ఎక్కుపెడుతున్నారు. ఇలాంటి పరిపక్వతలేని, మాటలు మాత్రమే చెప్పే వ్యక్తిని దేశ ప్రజలు ప్రధానిగా కోరుకోవడంలేదని తీవ్ర వ్యాఖ్యలు చేశారు. దీనిపై రాహుల్ స్పందిస్తూ ప్రధానికి మతిభ్రమించిందన్నారు. ‘అసలు ఈ ఎన్నికలు రాహుల్ కోసం కాదు. ప్రధాన మంత్రితో ఎలా వ్యవహరించాలో నేనిప్పుడు నేర్చుకున్నాను. నా మాటలకు ఆయన స్పందించలేకపోతే, ఆయనకి నిజంగా మతిభ్రమించినట్టే’ అంటూ రాహుల్ వ్యాఖ్యానించారు.

మోదీకి మనసులో బయటకు కనిపించనంత కోపం ఉందని, ప్రతి ఒక్కరిమీద ఆయనకు కోపం ఉంటుందని.. కేవలం తనపైన మాత్రమే కాదని రాహుల్ అన్నారు. తనతో ప్రమాదం ఉందని మోదీ భావిస్తున్నారని, అందుకే తానంటే ఆయనకు కోపమని చెప్పారు. మే 12 జరిగే కర్ణాటక ఎన్నికల్లో కాంగ్రెస్ పార్టీనే గెలుస్తుందని ఆయన ధీమా వ్యక్తం చేశారు. ప్రచార సమయంలో వ్యక్తిగత విమర్శలు చేసి ప్రతిపక్ష పార్టీ (బీజేపీ) తనకు తానే నిర్బంధంలో పడేసుకుందన్నారు.