NaMo: 20 ఏళ్లు అధికారంలో ఉన్న నేత.. మోదీ మరో ఘనత

టైమ్స్ జాబితాలో వరసగా నాలుగోసారి చోటు దక్కించుకొని ఇటీవల ప్రపంచం దృష్టిని ఆకర్షించిన ప్రధాని మోదీ.. బుధవారం (అక్టోబర్ 7) మరో ఘనత సాధించారు. వరసగా 20 ఏళ్ల పాటు అధికారంలో ఉన్న ప్రపంచ నేతల సరసన నిలిచారు. 2001లో సరిగ్గా ఇదే రోజున ఆయన గుజరాత్‌ సీఎంగా బాధ్యతలు చేపట్టారు. 13 ఏళ్ల పాటు ఆ పదవిలో కొనసాగారు. 2014 లోక్‌సభ ఎన్నికల సందర్భంగా ఆ పదవి నుంచి తప్పుకొని బీజేపీ తరఫున ప్రధాని అభ్యర్థిగా బరిలోకి దిగారు. పార్టీకి చరిత్రాత్మక విజయం అందించారు.

2014లో ప్రధాని పదవి చేపట్టిన మోదీ ఏడేళ్లుగా ఆ హోదాలో కొనసాగుతున్నారు. మొత్తంమీద 2001 నుంచి వరుసగా 20 ఏళ్ల పాటు ఆయన అధికారంలో ఉన్నారు. తాను పోటీ చేసిన ఏ ఎన్నికల్లోనూ ఓటమిని చవిచూడలేదు. తాజాగా ప్రధాని మోదీ సాధించిన ఘనతపై బీజేపీ నేతలు, ప్రముఖులు ప్రశంసలు కురిపిస్తున్నారు. సోషల్ మీడియా వేదికగా అభినందనలు తెలుపుతున్నారు. ట్విటర్‌లో #20thYearOfNaMo హ్యాష్‌ట్యాగ్‌ ట్రెండ్ అవుతోంది.

ప్రపంచంలో ఎక్కువ కాలం అధికారంలో ఉన్న వ్యక్తుల్లో మోదీ ఒకరంటూ కేంద్ర మంత్రి రవి శంకర్‌ ప్రసాద్‌ కొనియాడారు. అమెరికా మాజీ అధ్యక్షులు బిల్ క్లింటన్, జార్జ్ డబ్ల్యూ బుష్, ఫ్రాంక్లిన్ రూజ్‌వెల్ట్, బ్రిటన్‌ మాజీ ప్రధాని మార్గరెట్ థాచర్ పదవీ కాలాలతో ప్రధాని మోదీ పదవీ కాలాన్ని పోల్చారు. భారతీయులందరికీ ఇది ఎంతో గర్వకారణమని ఆయన పేర్కొన్నారు. ప్రపంచంతో పాటు భారత్‌లో శాంతి, స్థిరత్వం కోసం మరింత కాలం అధికారంలో కొనసాగే శక్తి మోదీకి లభించాలంటూ ఆయన ట్వీట్ చేశారు.

మోదీకి అభినందనలు తెలుపుతూ పలువురు మంత్రులు ట్వీట్లు చేశారు. మోదీతో కలిసి పనిచేయడం తన అదృష్టంగా భావిస్తున్నట్లు కేంద్ర మంత్రి కిరణ్ రిజుజు ట్వీట్ చేశారు. బీజేపీ అధికారిక ట్విటర్ ఖాతా ప్రత్యేక ట్వీట్ చేసింది.







Also Read: ట్రంప్ చికిత్సపై గందరగోళం.. వైట్‌హౌస్‌లో భయం భయం