మీడియా ప్రకటనలపై నిషేధం.. సోనియా సలహాపై ఎన్‌బీఏ తీవ్ర అభ్యంతరం

మీడియాకు ఇచ్చే ప్రకటనలపై రెండేళ్లపాటు నిషేధం విధించాలని కాంగ్రెస్ అధినేతి సోనియా గాంధీ ప్రధాని మోదీకి ఇచ్చిన సలహాను న్యూస్ బ్రాడ్‌కాస్టర్స్ అసోసియేషన్ (ఎన్‌బీఏ) తీవ్ర అభ్యంతరం వ్యక్తం చేసింది. మీడియా ప్రతినిధులు తమ ప్రాణాలను సైతం లెక్క చేయకుండా దేశం కోసం పని చేస్తూ.. కరోనా మహమ్మారి గురించి వార్తలను అందిస్తున్నారని ఎన్‌బీఏ తెలిపింది. సోనియా లాంటి వ్యక్తి నుంచి ఇలాంటి స్టేట్‌మెంట్ రావడం తమను తీవ్ర నిరుత్సాహానికి గురి చేసిందని పేర్కొంది.

ఓవైపు ఆర్థిక మాంద్యం కారణంగా ఎలక్ట్రానిక్ మీడియాకు ప్రకటనల ద్వారా ఆదాయం తగ్గిపోగా.. మరోవైపు లాక్‌డౌన్ వల్ల పరిస్థితి ఇబ్బందికరంగా మారిందని ఎన్‌బీఏ పేర్కొంది. కోవిడ్ నేపథ్యంలో తమ రిపోర్టర్లు, ప్రొడక్షన్ సిబ్బంది భద్రత కోసం ఛానళ్లు భారీగా ఖర్చు చేస్తున్నాయని తెలిపింది. ఇలాంటి పరిస్థితుల్లో ప్రభుత్వ, ప్రభుత్వ రంగ సంస్థల ప్రకటనల్ని పూర్తిగా నిషేధించాలని సలహా ఇవ్వడం ఏమాత్రం సమంజసం కాదని తెలిపింది.

మీడియా ప్రయోజనాలను దృష్టిలో ఉంచుకొని.. ప్రకటనలపై రెండేళ్లపాటు పూర్తి నిషేధం విధించాలని ప్రధాని మోదీకి ఇచ్చిన సలహాను సోనియా ఉపసంహరించుకోవాలని ఎన్‌బీఏ కోరింది. ఈ మేరకు ఎన్‌బీఏ ప్రెసిడెంట్ రజత్ శర్మ పేరిట ప్రెస్ రిలీజ్ జారీ చేసింది.
79_PRESS RELEASE_7.4.20
కరోనా క్లిష్ట పరిస్థితులను ఎదుర్కోవడం కోసం ఏం చేయాలో సలహా ఇవ్వమని ప్రధాని మోదీ మాజీ రాష్ట్రపతులు, మాజీ ప్రధానులు సహా పలువురు నేతలను కోరారు. దీనికి స్పందించిన సోనియా... ప్రభుత్వం, ప్రభుత్వ రంగ సంస్థలు టీవీ, ప్రింట్, ఆన్‌లైన్ మీడియాకు ఇచ్చే ప్రకటనలపై రెండేళ్ల నిషేధం విధించాలని సూచించారు. మరో నాలుగు అంశాలను కూడా ఆమె ప్రధాని దృష్టికి తీసుకొచ్చారు.