Nationalist Congress Party: పవార్‌ సాబ్.. మీరే అధ్యక్షుడిగా ఉండాలి.. ఎన్సీపీ తీర్మానం

Nationalist Congress Party: నేషనలిస్ట్‌ కాంగ్రెస్‌ పార్టీ చీఫ్ శరద్ పవార్.. అధ్యక్ష పదవికి రాజీనామా చేశారు. ఈ నేపథ్యంలో ఆయన రాజీనామా నిర్ణయంపై చర్చించడంతో పాటు.. పార్టీ నూతన అధ్యక్షుడి ఎంపిక కోసం.. ఎన్సీపీ ఓ కమిటీని ఏర్పాటు చేసింది. శుక్రవారం సమావేశమైన ఆ కమిటీ సభ్యులు.. శరద్ పవార్‌ (Sharad Pawar) రాజీనామాను తిరస్కరించారు. అయితే.. కమిటీ నిర్ణయంపై శరద్ పవార్ ఎలా స్పందిస్తారన్నది ఇప్పుడు చర్చనీయాంశంగా మారింది. అజిత్‌ పవార్‌, సుప్రియా సూలే, ప్రఫుల్‌ పటేల్‌, ఛగన్‌ భుజ్‌బల్‌ సహా.. 18 మంది సభ్యులు ఈ కమిటీలో ఉన్నారు. వీరు సమావేశం అయ్యి.. శరద్‌ పవార్‌ రాజీనామాను తిరస్కరిస్తూ తీర్మానం ప్రవేశపెట్టారు. దాన్ని కమిటీ సభ్యులు ఆమోదించారు. పార్టీ చీఫ్‌గా శరద్ పవారే కొనసాగాలని కోరుతూ.. మరో తీర్మానం ప్రవేశపెట్టగా.. దానికి కూడా ఏకగ్రీవంగా ఆమోదం లభించింది.
ఎన్సీపీ అధ్యక్షుడిగా కొనసాగడంపై రెండ్రోజుల్లో నిర్ణయం తీసుకుంటానని.. శరద్‌ పవార్‌ ఇప్పటికే ప్రకటించారు. అయితే.. అధ్యక్షుడిగా పవార్‌ను కొనసాగిస్తూ.. కొత్తగా కార్యనిర్వాహక అధ్యక్ష పదవిని తీసుకురావాలని పార్టీలోని కీలక నేతలు భావిస్తున్నట్టు తెలుస్తోంది. ఒకవేళ వర్కింగ్ ప్రెసిడెంట్ పదవి తీసుకొస్తే.. ఆ బాధ్యతలను పవార్‌ కుమార్తె సుప్రియా సూలే అప్పగిస్తారని, అది సాధ్యం కాకపోతే.. అజిత్ పవార్‌కు అప్పగిస్తారనే టాక్ వినిపిస్తోంది.