సీబీఐ కొత్త బాస్‌.. 20 ఏళ్ల క్రితమే ఇలాంటి వ్యాఖ్యలా?

సీబీఐ టాప్ బాస్‌ల మధ్య వివాదం నెలకొనడంతో.. ఆపద్ధర్మ చీఫ్‌గా ఐపీఎస్ అధికారి మన్నెం నాగేశ్వర రావును కేంద్రం నియమించిన సంగతి తెలిసిందే. తెలుగు వ్యక్తి అయిన నాగేశ్వర రావును సీబీఐ బాస్‌గా ఎంపిక చేయడంపై విమర్శలు వెల్లువెత్తుతున్నాయి. ఆయనేమీ శుద్ధ పూస కాదని ఆధారాలతో సహా నిరూపించే ప్రయత్నాలు చేస్తున్నారు. నాగేశ్వర రావు మైనార్టీ వ్యతిరేకి అని సీపీఐ (ఎం) ఒడిశా విభాగం ఆరోపిస్తోంది. 20 ఏళ్ల క్రితం యువ అధికారిగా ఆయన చేసిన వివాదాస్పద ప్రసంగాన్ని తెర మీదకు తీసుకొస్తోంది.

1986 బ్యాచ్ ఒడిశా కేడర్ ఐపీఎస్ అధికారి అయిన నాగేశ్వర రావు.. 1998లో బరంపురంలో నిర్వహించిన సభలో వివాదాస్పద వ్యాఖ్యలు చేశారు. ఆయన వ్యాఖ్యలపై ప్రజాగ్రహం వ్యక్తం కావడంతో.. రెవిన్యూ డివిజనల్ కమిషనర్ (ఆర్డీసీ), డీఐజీ విచారణ జరిపి.. బరంపురం నుంచి మరో చోటకు బదిలీ చేశారు.

‘‘1998, డిసెంబర్ 10న అంతర్జాతీయ మానవ హక్కుల దినోత్సవం సందర్భంగా ఏర్పాటు చేసిన ఓ కార్యక్రమంలో నాగేశ్వర రావు మాట్లాడుతూ.. మానవ హక్కులకు ప్రధాన ముప్పు ముస్లింలు, క్రైస్తవులు, మార్కిస్టులంటూ వివాదాస్పద వ్యాఖ్యలు చేశార’’ని సీపీఐ(ఎం) ఒడిశా రాష్ట్ర కమిటీ సెక్రటరీ అలీ కిశోర్ పట్నాక్ శుక్రవారం ఆరోపించారు. ఎకనమిక్ టైమ్స్‌కు ఆయన ఫోన్ ద్వారా ఈ విషయాలను వెల్లడించారు.

‘ఈ వ్యాఖ్యల వల్ల బరంపురం డెవలప్‌మెంట్ అథారిటీ వైస్ చైర్మన్ పదవి నుంచి ఆయన్ను బదిలీ చేశారు. సైద్ధాంతిక పరంగా బీజేపీకి స్నేహితుడు కావడం వల్లే సీబీఐ డైరెక్టర్‌గా నాగేశ్వర రావును నియమించార’ని ఆ సమయంలో గంజాం జిల్లా పార్టీ కార్యదర్శిగా పని చేసిన పట్నాయక్ విమర్శించారు. అనుపమ్ భారత్ అనే స్థానిక పత్రికలో డిసెంబర్ 13న ఈ వార్త వచ్చిందని కూడా ఆయన తెలిపారు.