బ్యాంకుల్లో కొత్త నోట్లు ఇస్తున్నారు!

గురువారం నుంచి బ్యాంకుల్లో కొత్త నోట్ల జారీ మొదలైంది. ఉదయం నుంచే బ్యాంకుల ముందు జనాలు బారులు తీరారు. రూ. 500, రూ. 1000 నోట్లపై కేంద్ర ప్రభుత్వం ఆకస్మాత్తుగా నిషేధం విధించటంతో జనాల వద్ద డబ్బుండి కూడా ఖర్చు పెట్టలేని పరిస్థితి నెలకొంది. ఈ నేపథ్యంలో ప్రజా అవసరాలను దృష్టిలో ఉంచుకొని పాత నోట్లను బదిలీ చేసే ప్రక్రియను బ్యాంకులు చేపట్టాయి. ​ 500, 1000 రూపాయల నోట్ల స్థానంలో కొత్త రూ. 2000 నోట్లను అందిస్తున్నారు. కొత్త నోట్ల పంపిణీ విషయంలో దేశవ్యాప్తంగా బ్యాంకులు అన్ని ఏర్పాట్లు చేశాయి. రద్దీని దృష్టిలో ఉంచుకొని అదనపు కౌంటర్లు కూడా ఏర్పాటు చేశారు. రెండు రోజుల తర్వాత కొత్త నోట్లు అందుకున్న ప్రజలు ఊపిరి పీల్చుకుంటున్నారు.



మరోవైపు రూ. 500, రూ. 1000 నోట్లను రద్దు చేస్తూ ప్రభుత్వం తీసుకున్న నిర్ణయాన్ని సవాల్ చేస్తూ సుప్రీకోర్టులో ప్రజా ప్రయోజనాల వ్యాజ్యం దాఖలైంది. దీనిపై సుప్రీం త్వరలో విచారణ చేపట్టనుంది.