ఇలా చేస్తే ప్రభుత్వాన్ని కూల్చబోం: దినకరన్

జయలలిత మరణించిన నాటి నుంచి మలుపులు తిరుగుతున్న తమిళ రాజకీయాలు.. మరోసారి ఉత్కంఠ భరితంగా మారాయి. ఇటీవలే పన్నీరు, ఈపీఎస్ వర్గాలు ఏకం కావడంతో.. కథ సుఖాంతమైందని చాలా మంది భావించారు. కానీ దినకరన్ క్యాంపు మాత్రం ఈపీఎస్ ప్రభుత్వాన్ని కూల్చేస్తామని చెప్పడంతో మరోసారి ఉత్కంఠ మొదలైంది. 19 మంది ఎమ్మెల్యేల మద్దతు ఉన్న దినకరన్ వర్గం.. తమకు పళనిస్వామి ప్రభుత్వంపై విశ్వాసం లేదని గవర్నర్ సీహెచ్ విద్యాసాగర్ రావుకు లేఖ రాసింది.

తాజాగా దినకరన్ క్యాంపు మరో ప్రతిపాదనను అన్నాడీఎంకే ప్రభుత్వం ముందు ఉంచింది. ప్రభుత్వానికి మద్దతు ఇస్తాం.. కానీ ఈపీఎస్ స్థానంలో సెంగోట్టయాన్‌ను సీఎం చేయాలని డిమాండ్ చేశారు. అలా చేస్తే మేం అన్నాడీఎంకే ప్రభుత్వంలోనే కొనసాగుతామని దినకరన్ వర్గ ఎమ్మెల్యేలు స్పష్టం చేశారు.

అసెంబ్లీ స్పీకర్ ధనపాల్‌ను సీఎం చేయాలని శశికళ సోదరుడు వీకే దివకరన్ సూచిస్తున్నారు. తాము ఈపీఎస్ ప్రభుత్వానికి మద్దతు ఉపసంహరించు కుంటామని తిరుగుబాటు ఎమ్మెల్యేలు గవర్నర్‌కు లేఖ రాశారు. వాస్తవానికి వీరికి ఈపీఎస్‌ను పదవి నుంచి తప్పించాలని తప్పితే.. అవిశ్వాస తీర్మానం దాకా వెళ్లాలనే ఆలోచన లేదు. అలా జరిగితే పార్టీ విప్ జారీ చేస్తుంది. పార్టీ నిర్ణయానికి విరుద్ధంగా ఓటేస్తే ఆరేళ్లపాటు అనర్హత వేటు పడుతుందనే భయం వారిలో ఉంది.

ఇదే సమయంలో ప్రతిపక్షానికి చెందిన ఎమ్మెల్యేలతో ఈపీఎస్ వర్గం చర్చలు జరుపుతోంది. ప్రతిపక్షం గనుక ప్రభుత్వానికి మద్దుతునిస్తే.. ఈపీఎస్ బల పరీక్షకు వెళ్లే అవకాశం ఉంది. పార్టీలో అంతర్గతంగా అసమ్మతి తెలియజేసిన ఎమ్మెల్యేలను అనర్హులుగా ప్రకటించడం కుదరదని సుప్రీ కోర్టు గతంలో తీర్పు వెలువరించింది. దీన్ని ఆసరాగా చేసుకొని ఈపీఎస్‌ను సీఎం పదవి నుంచి తప్పించాలని దినకరన్ వర్గం ఎమ్మెల్యేలు గవర్నర్‌కు లేఖ రాశారు.