పట్టాలు తప్పిన మరో రైలు: 70 మందికి గాయాలు

నాలుగు రోజుల క్రితం ఉత్తరప్రదేశ్‌లో జరిగిన ఘోర రైలు ప్రమాద ఘటన మరవక ముందే అదే రాష్ట్రంలో మరో రైలు ప్రమాదం చోటుచేసుకుంది. అజమ్‌గఢ్ నుంచి ఢిల్లీ వెళ్తున్న కైఫియత్ ఎక్స్‌ప్రెస్ ఉత్తరప్రదేశ్‌లోని ఔరియా జిల్లాలో పట్టాలు తప్పింది. అదృష్టవశాత్తు ఈ ప్రమాదంలో ఎలాంటి ప్రాణ నష్టం సంభవించలేదు. అయితే 70 మంది గాయపడ్డారు. వేగంగా వస్తున్న కైఫియత్ ఎక్స్‌ప్రెస్ రైల్వే క్రాసింగ్‌ను దాటుతున్న ఓ బంపర్ వాహనాన్ని ఢీకొట్టడంతో మొత్తం 9 బోగీలు పట్టాలు తప్పాయి. పాటా, అచ్చాల్దా రైల్వే స్టేషన్ల మధ్య బుధవారం తెల్లవారుజామున 2.50 గంటలకు ఈ ప్రమాదం జరిగింది.

ప్రమాదంలో గాయపడిన వారిని అచ్చాల్దాలోని ప్రభుత్వ ఆసుపత్రికి తరలించారు. వీరిలో ఇద్దరి పరిస్థితి విషమంగా ఉన్నట్లు ఉత్తరప్రదేశ్‌ హోంశాఖ కార్యదర్శి అనిల్‌కుమార్‌ తెలిపారు. ఘటనాస్థలికి చేరుకున్న ఎన్‌డీఆర్‌ఎఫ్‌ బృందాలు సహాయక చర్యలు చేపట్టాయి. ఈ ప్రమాదంపై రైల్వే శాఖ మంత్రి సురేశ్‌ ప్రభు ట్విట్టర్ ద్వారా స్పందించారు. ‘కొంతమంది ప్రయాణికులు గాయపడ్డారు. వారిని సమీపంలోని ఆసుపత్రులకు తరలించారు. నేను స్వయంగా అక్కడి పరిస్థితిని పర్యవేక్షిస్తున్నాను. సీనియర్ అధికారులను వెంటనే ఘటనా స్థలికి వెళ్లాలని ఆదేశించాను’ అని సురేశ్ ప్రభు ట్వీట్ చేశారు.
Some passengers have received Injuries and have been shifted to nearby hospitals.I am personally monitoring situation,rescue operations 2/ — Suresh Prabhu (@sureshpprabhu) August 23, 2017
కైఫియత్ ఎక్స్‌ప్రెస్ పట్టాలు తప్పడంతో ఢిల్లీ-హౌరా మార్గంలో రైళ్ల ప్రయాణానికి అంతరాయం ఏర్పడింది. హౌరా నుంచి న్యూ ఢిల్లీ వెళ్లే రాజధాని ఎక్స్‌ప్రెస్ సహా మొత్తం ఐదు రైళ్లను దారి మళ్లించారు. అలాగే కాన్పూర్-న్యూ ఢిల్లీ శతాబ్ది ఎక్స్‌ప్రెస్ సహా ఏడు రైళ్లను రద్దు చేశారు. 40 లోకల్ రైళ్లను కూడా దారి మళ్లించారు.