లగ్జరీ సూట్‌లో ఫ్యామిలీతో నీరవ్ మోదీ జల్సా..!

విదేశాలకు చెక్కేసిన నీరవ్ మోదీ ఆచూకీ తెలిసినట్లు సమాచారం. నీరవ్ న్యూయార్క్‌లో కనిపించినట్లు వార్తలొస్తున్నాయి. జేడబ్ల్యూ మారియట్స్ ఎస్సెక్స్ హౌస్‌లోని లగ్జరీ సూట్‌లో ఉన్నారట. మోదీకి చెందిన మాడిసన్ అవెన్యూ జ్యువెలరీ రిటైర్ స్టోర్‌కు దగ్గర్లోనే ఈ సూట్ ఉంది. పీఎన్‌బీ కుంభకోణం బయటపడ్డ సమయంలో మాన్‌హట్టన్‌ అపార్ట్‌మెంట్లోనే నీరవ్, అతని భార్య అమి మోదీ ఉన్నారని... తరచూ ఇంటి బయటకు, లోపలకు వెళ్తూ కనిపించారని కొంతమంది చెప్పారట. అయితే దీనిపై ఈడీ కాని, అధికారులు కాని ఎలాంటి ప్రకటన చేయలేదు.

జనవరి 1న భారత్ నుంచి వెళ్లిపోయాడు. అదే నెల 6న నీరవ్ మేనమామ, భాగస్వామి మోహుల్ ఛోక్సి పరారయ్యాడు. సీబీఐ, ఈడీ ఇప్పటికే రంగంలోకి దిగడంతో పాటు వారి పాస్‌పోర్టులు రద్దు చేసేందుకు అవసరమైన చర్యలు తీసుకుంటున్నాయి. అలాగే నీరవ్‌కు సంబంధించిన ఆస్తులపై కూడా ఫోకస్ పెట్టారు. మోదీ పంజాబ్ నేషనల్ బ్యాంకును రూ.11,346 కోట్ల మేర మోసం చేశారు. స్కామ్ ఇటీవలే బయటపడినా... 2011 నుంచే వ్యవహారం నడుస్తున్నట్లు తెలుస్తోంది. నీరవ్ మోదీ దేశంలోనే బడా వజ్రాల వ్యాపారి.