Nirbhaya Convict: ముకేశ్‌ను జైల్లో రేప్ చేశారు.. సుప్రీంలో లాయర్ సంచలన వ్యాఖ్యలు

రాష్ట్రపతి క్షమాభిక్ష పిటిషన్ కొట్టివేయడంతో.. నిర్భయ దోషుల్లో ఒకరైన ముకేశ్ సింగ్ సుప్రీం కోర్టులో అత్యవసర పిటిషన్ దాఖలు చేసిన సంగతి తెలిసిందే. మంగళవారం ఈ పిటిషన్‌పై అత్యున్నత న్యాయస్థానం విచారణ చేపట్టింది. ఈ సందర్భంగా ముకేశ్ తరఫు లాయర్ వాదిస్తూ.. తన క్లయింట్‌ను తిహార్ జైల్లో రేప్ చేశారని ఆరోపించారు. 2012 డిసెంబర్లో నిర్భయ గ్యాంగ్ రేప్ జరగ్గా.. 2013 నుంచి అతడు ఢిల్లీలో తిహార్ జైల్లో శిక్ష అనుభవిస్తున్నాడు.

తన క్షమాభిక్ష పిటిషన్‌ను రాష్ట్రపతి కొట్టివేయడాన్ని ముకేశ్ సింగ్ సవాల్ చేశారు. హోమంత్రిత్వ శాఖ, ఢిల్లీ ప్రభుత్వ సిఫారసుల మేరకు రాష్ట్రపతి ఈ నిర్ణయం తీసుకున్నారనే వార్తలొచ్చాయి. దోషులకు విధించిన ఉరి శిక్షను వెనక్కి తీసుకోవద్దని హోంశాఖ, ఢిల్లీ సర్కారు సూచించాయి. నిర్భయ గ్యాంగ్ రేప్ కేసులో మరో దోషి అయిన అక్షయ్‌తో లైంగిక సంబంధం పెట్టుకునేలా ముకేశ్‌ను బలవంతం చేశారని అతడి తరఫు లాయర్ వాదించారు. కాగా ముకేశ్ తరఫు లాయర్ వాదనలను సొలిసిటర్ జనరల్ ఖండించారు. కేసు వాదనలు ఇంకా కొనసాగుతున్నాయి.

ఈ కేసులో మరో దోషి, ముకేశ్ సోదరుడైన రామ్ సింగ్ తిహార్ జైల్లోని సెల్‌లో 2013లో హత్యకు గురయ్యాడని ముకేశ్ తరఫు లాయర్ వాదించారు. 2012 డిసెంబర్ 16 రాత్రి సమయంలో ఢిల్లీలో తన స్నేహితుడితో కలిసి సినిమా చూసి ఇంటికెళ్తున్న నిర్భయను బస్సు ఎక్కించుకున్న ఆరుగురు దుండగులు.. ఆమె స్నేహితుణ్ని కొట్టి.. బస్సు వెనుక సీట్లో ఒకరి తర్వాత మరొకరు అత్యాచారానికి ఒడిగట్టారు. ఆమె ప్రయివేట్ భాగాల్లో తుప్పు పట్టిన ఇనుప రాడ్ జొప్పించి తీవ్రంగా గాయపర్చారు.

అనంతరం వారిద్దర్నీ బస్సులో నుంచి తోసేశారు. ఆమెపై నుంచి బస్సు ఎక్కించే ప్రయత్నం చేయగా.. నిర్భయ స్నేహితుడు పక్కకు లాగి కాపాడాడు. ఢిల్లీలో చికిత్స పొందిన నిర్భయను.. మెరుగైన చికిత్స కోసం సింగపూర్‌లో మౌంట్ ఎలిజబెత్ హాస్పిటల్‌కు తరలించగా.. పరిస్థితి విషమించడంతో డిసెంబర్ 29న కన్నుమూసింది.