నిర్భయ తల్లే ఇంత అందంగా ఉంటే..?

ఢిల్లీలో ఆరేళ్లక్రితం జరిగిన నిర్భయ ఘటన ఇప్పటికీ తలుచుకుంటే గుండె బాధతో బరువెక్కుతుంది. పాశవికంగా అత్యాచారానికి గురైన బాధితురాలితో ఏ బంధమూలేని మనకే ఇలా ఉంటే..? నిర్భయ కన్నతల్లి ఆశాదేవికి ఇంకెంత బాధ ఉంటుంది..? కానీ.. ఓ మాజీ డీజీపీ అసందర్భ వ్యాఖ్యలతో సహచర మహిళల ముందు ఆమె శోకాన్ని మరింత పెంచాడు. స్త్రీలను సన్మానించేందుకు ఏర్పాటు చేసిన సభలో నిర్భయ, ఆమె తల్లి ఆశాదేవి అందాన్ని వర్ణిస్తూ అపహాస్యం చేశాడు.

బెంగళూరులో తాజాగా స్త్రీలను సన్మానించేందుకు ఓ కార్యక్రమాన్ని ఏర్పాటు చేశారు. దీనికి అతిథిగా కర్ణాటక మాజీ డీజీపీ హెటీ సంగ్లియానా‌ని అతిథిగా ఆహ్వానించారు. గత ఆరేళ్లుగా స్త్రీలపై లైంగిక వేధింపులకి వ్యతిరేకంగా ఆశాదేవీ పోరాడుతుండటంతో ఆమెని కూడా సన్మానించాలని పిలిపించారు. ఈ కార్యక్రమంలో భాగంగా మాజీ డీజీపీ మాట్లాడుతూ ‘నిర్భయ తల్లిని ఇప్పుడే చూశాను. చక్కగా, చాలా అందంగా ఉంది. తల్లే ఇంత అందంగా ఉంటే.. కూతురు ఇంకెంత అందంగా ఉండేదో..?’ అని వివాదాస్పద వ్యాఖ్యలు వ్యాఖ్యానించాడు. అంతేకాకుండా.. పురుషుల బలంతో పోలిస్తే.. మహిళల బలం తక్కువగా ఉంటుందని.. అందుకే అత్యాచారం సమయంలో వారు లొంగిపోక తప్పదని మాజీ డీజీపీ చెప్పడం విమర్శలకి తావిస్తోంది.