కేంద్ర మంత్రి నితిన్ గడ్కరీకి కరోనా పాజిటివ్

మోదీ కేబినెట్‌లో మరో మంత్రికి కరోనా వైరస్ సోకింది. కేంద్ర రోడ్లు, భవనాల శాఖ మంత్రి నితిన్ గడ్కరీ కొవిడ్-19 మహమ్మారి బారినపడ్డారు. ఈ విషయాన్ని ఆయనే స్వయంగా ట్విటర్ ద్వారా వెల్లడించారు. ప్రస్తుతం తన ఆరోగ్య పరిస్థితి బాగానే ఉందని.. హోమ్ ఐసోలేషన్‌లో ఉన్నానని ఆయన వెల్లడించారు. ఇటీవల తనను కలిసిన వారందరూ తగిన జాగ్రత్తలు తీసుకోవాలని ఆయన సూచించారు.

‘నిన్న కాస్త బలహీనంగా కనిపించడంతో ఫ్యామిలీ డాక్టర్‌ను సంప్రదించాను. వైద్య పరీక్షల్లో భాగంగా కరోనా టెస్టు నిర్వహించగా పాజిటివ్‌గా నిర్ధారణ అయింది. నా ఆరోగ్యం బాగానే ఉంది. ప్రస్తుతం ఐసోలేషన్‌లో ఉన్నాను’ అని గడ్కరీ ట్వీట్ చేశారు. ‘ఇటీవల నన్ను కలిసిన వారందరూ తగిన జాగ్రత్తలు తీసుకోండి..’ అంటూ మరో ట్వీట్ చేశారు.

దేశంలో కరోనా వైరస్ సామాన్యులతో పాటు ప్రముఖులనూ వణికిస్తోంది. కేంద్రంలో ఇప్పటికే ఏడుగురు మంత్రులకు కరోనా సోకింది. మొత్తం 25 మంది ఎంపీలు వైరస్ బారినపడ్డారు. పలు రాష్ట్రాల్లో మంత్రులు, ఎమ్మెల్యేలు, ఎమ్మెల్సీలు, వివిధ పార్టీల నేతలు కరోనా బారినపడ్డారు. పలువురు మృత్యువాతపడ్డారు కూడా.

Also Read: గల్వాన్‌లో చైనా వైపు 60 మంది జవాన్లు మృతి.. ఘోర పరాజయం!