Nitish Kumar: బీహార్ సీఎం నితిష్ కుమార్ రాజీనామా

Nitish Kumar: బీహార్‌లో రాజకీయ సంక్షోభం క్లైమాక్స్‌కు చేరుకుంది. సీఎం పదవికి నితిష్‌ కుమార్ రాజీనామా చేశారు. గవర్నర్‌ను కలిసి రాజీనామా పత్రాన్ని అందించారు. పార్టీలోని అందరి ఆకాంక్ష మేరకే ఎన్డీయేతో తెగదెంపులు చేసుకున్నట్టు నితిష్ కుమార్ వెల్లడించారు. ఇక ఆర్జేడీతో కలసి కొత్త ప్రభుత్వం ఏర్పాటు చేయనున్నారు. ఆ దిశగా ఆయన అడుగులు వేస్తున్నారు. దీనికోసం ఇప్పటికే రంగం సిద్ధమైనట్టు తెలుస్తుంది.


ఇప్పటి వరకు రాష్ట్రంలో ఎన్‌డీఏ కూటమితో నితిష్‌ కుమార్ ప్రభుత్వాన్ని ఏర్పాటు చేశారు. అయితే తాజాగా ఎన్‌డీఏ‌కు గుడ్‌ బై చెప్పేశారు. తన పార్టీని చీల్చేందుకు బీజేపీ ప్రయత్నిస్తున్నట్టు నితిష్ కుమార్ అనుమానించారు. ఆ క్రమంలో బీజేపీ నుంచి దూరంగా అడుగులు వేస్తూ వచ్చారు. ఇందులో భాగంగానే ఇటీవల కేంద్రం ఏర్పాటు చేసిన సమావేశాలకు కూడా ఆయన హాజరు కాలేదు. ఇంతలో తన రాజకీయ చతురతను ప్రదర్శిస్తూ ఎన్డీయేతో పొత్తును వదిలేస్తున్నట్టు ప్రకటించారు.

అయితే ఎన్డీయేతో దూరంగా జరిగితే.. నితిష్ కుమార్ ప్రభుత్వం మైనార్టీలో పడిపోతుంది. దాంతో ఆర్జేడీ, కాంగ్రెస్ పార్టీలతో కలసి కొత్త ప్రభుత్వాన్ని ఏర్పాటు చేయడానికి ఇప్పటికే కసరత్తు చేసినట్టు తెలుస్తుంది. అందులో భాగంగా జోరుగా చర్చలు కూడా జరిగాయి. ఈ క్రమంలో బీహార్‌లో కొత్త ప్రభుత్వం కొలువు దీరనున్నట్టు సంకేతాలు అందుతున్నాయి.. ఆ కొత్త ప్రభుత్వం ఆర్జేడీ నేత తేజస్వీ యాదవ్ డిప్యూటీ సీఎం అయ్యే అవకాశాలు కనిపిస్తున్నాయి.