లాలూ కుమారుడి పదవికి చెక్‌పెట్టనున్న నితీష్?

బీహార్‌లో రాజకీయ పరిణామాలు వేగంగా మారుతున్నాయి. మిత్రపక్షాలు మధ్య రోజు రోజుకూ అంతరం మరింత పెరిగిపోతోంది. అధికారాన్ని పంచుకుంటున్న జేడీయూ, ఆర్జేడీల మధ్య ప్రచ్ఛన్న యుద్ధం మొదలైంది. ఆర్జేడీ అధినేత లాలూ ప్రసాద్ యాదవ్ కుటుంబంపై సీబీఐ, ఈడీ దాడుల నేపథ్యంలో ముఖ్యమంత్రి నితీష్ కుమార్, లాలూల మధ్య అగాథం పెరిగింది. ఈ దాడులపై నితీష్‌కుమార్ మాట్లాడకపోవడంతో వివాదం మరింత ముదిరి పాకాన పడింది. నితీష్ వైఖరి చూస్తే భాజపాకు దగ్గరవుతున్నట్లు సంకేతాలు వెలువడుతున్నాయి. ఇంకోవైపు ఈ రోజు లాలూప్రసాద్ యాదవ్ తన పార్టీ నేతలతో కీలక సమావేశం ఏర్పాటు చేశారు. ప్రస్తుతం నెలకొన్న రాజకీయ పరిణామాలపై ఈ సమావేశంలో చర్చించే అవకాశం ఉంది.

మరోవైపు ముఖ్యమంత్రి నితీష్ కుమార్ కూడా తన పార్టీ ఎంపీలు, ఎమ్మెల్యేలతో రేపు సమావేశం కానున్నారు. లాలూ కుమారుడు, డిప్యూటీ సీఎం‌గా ఉన్న తేజశ్వీ యాదవ్‌ను పదవి నుంచి వైదొలగాలని నితీష్ కుమార్ కోరే అవకాశం ఉందని సమాచారం. అయితే, తేజశ్వీ యాదవ్ తనంటతానుగా డిప్యూటీ సీఎం పదవికి రాజీనామా చేస్తే బాగుంటుందని నితీష్ భావిస్తున్నారట. దీనిపై ఆయన ప్రకటించకపోతే రేపు జరిగే సమావేశంలో నితీష్ కుమార్ ఒత్తిడి తెచ్చే అవకాశం ఉందని విశ్వసనీయ వర్గాలు పేర్కొంటున్నాయి.

వాస్తవానికి ఈ రోజు రాష్ట్ర ప్రభుత్వం చేపట్టిన 'లోక్ సంవాద్' కార్యక్రమం జరగాల్సి ఉంది. అయితే, నితీష్ అనారోగ్యంతో ఉన్నారని... అందువల్ల ఈ కార్యక్రమాన్ని వాయిదా వేస్తున్నట్టు ప్రకటన వెలువడింది. కానీ డిప్యూటీ సీఎంతో వేదికను పంచుకోవాల్సి ఉండటం కారణంగానే... నీతీష్ ఈ కార్యక్రమాన్ని వాయిదా వేసినట్టు సమాచారం. అంతేకాదు ఉప రాష్ట్రపతి అభ్యర్థిని నిలబెట్టే విషయంపై కాంగ్రెస్‌తోసహా మిత్రపక్షాలు మంగళవారం సమావేశం కానున్నాయి. ఈ సమావేశానికి కూడా నితీష్ కుమార్ హాజరు కావడంలేదు. మొన్నటికి మొన్న రాష్ట్రపతి ఎన్నికల విషయంలో ఝలక్‌ ఇచ్చిన ఆయన ఇప్పుడు ఉపరాష్ట్రపతి ఎన్నికల విషయంలో కూడా అలాగే చేశారు. గతంలో కూడా రాష్ట్రపతి అభ్యర్థిపై ఏర్పాటుచేసిన సమావేశానికి నితీష్‌ డుమ్మా కొట్టిన విషయం తెలిసిందే. దీనిపై కాంగ్రెస్‌ నేతలంతా నితీష్‌పై ఆగ్రహం వ్యక్తం చేస్తున్న తరుణంలో ఆయన్ను ఏ ఒక్కరూ తిట్టొద్దని ఉపరాష్ట్రపతి ఎన్నికల విషయంలో తమకే మద్దతు ఇస్తున్నారని రాహుల్‌ సొంత పార్టీ నేతలకు చెప్పారు.