ఆధార్ లేదని గెంటేస్తే.. ఆసుపత్రి గేటు వద్దే..

ఆధార్ కార్డు లేదని ఓ నిండు గర్భిణిని అడ్మిట్ చేసుకోడానికి నిరాకరిస్తే.. ఆసుపత్రి గేటు వద్దే ప్రసవించింది. గుర్గావ్‌లోని ప్రభుత్వ ఆసుపత్రిలో ఈ ఘటన చోటు చేసుకుంది. మున్ని కేవాత్ (25) అనే గర్భిణికి శుక్రవారం (ఫిబ్రవరి 9) ఉదయం పురిటినొప్పులు ఎక్కువయ్యాయి. దీంతో ఆమె కుటుంబసభ్యులు సమీపంలోని ప్రభుత్వ ఆసుపత్రికి తీసుకెళ్లారు. అయితే.. వారు మిన్నికేవాత్ ఆధార్ కార్డును ఇంటి వద్దే మరచిపోయి వచ్చారు. ఆమె ఆధార్ కార్డు ఉంటేనే అడ్మిట్ చేసుకుంటామని ఆసుపత్రి సిబ్బంది ఖరాకండీగా చెప్పేశారు. ఆధార్ నంబర్ చెప్తామని, కార్డు తర్వాత తీసుకొచ్చి చూపెడతామని ఆమె భర్త రామ్‌సింగ్ ఎంతగా వేడుకున్నా వాళ్లు కనికరించలేదు.

అప్పటికే మున్నికి పురిటి నొప్పులు తీవ్రమవడంతో.. హాస్పిటల్ గేటు వద్దే ప్రసవించింది. పండంటి ఆడబిడ్డకు జన్మనిచ్చింది. ఈ తతంగాన్నంతా అక్కడున్న కొంతమంది తమ సెల్‌ఫోన్లలో చిత్రీకరించి.. ఆసుపత్రి ఉన్నతాధికారుల దృష్టికి తీసుకెళ్లారు.

‘ఆధార్ కార్డు తర్వాత తీసుకొస్తానని, మున్నీకి వైద్యం అందించాలని ఎంతగా వేడుకున్నా వాళ్లు పట్టించుకోలేదు. నా భార్యకు నొప్పులు ఎక్కువ కావడంతో కాజువాల్టీ వార్డుకు తీసుకెళ్లా. మున్నీని అక్కడ కూర్చోడానికి కూడా అనుమతించలేదు. దీంతో ఎమర్జెన్సీ వార్డు గేటు బయటే ఆమె ప్రసవించింది. దేవుడి దయవల్ల తల్లీబిడ్డలు క్షేమంగా ఉన్నారు.’ అని రామ్‌సింగ్ చెప్పాడు.

ఘటనపై విచారణ చేపట్టిన హాస్పిటల్ చీఫ్ మెడికల్ ఆఫీసర్ రాజోరా.. అందుకు కారణమైన మహిళా డాక్టర్, నర్సులను సస్పెండ్ చేశారు. నిండు గర్భిణి పట్ల నిర్లక్ష్యంగా వ్యవహరించి, వైద్యం చేయడానికి నిరాకరించిన డాక్టర్, నర్సులపై కఠిన చర్యలు తీసుకోవాలని బాధితురాలి బంధువులు డిమాండ్ చేస్తున్నారు.

Read this in English