NPR: జాతీయ జనాభా జాబితా.. కేంద్రం కీలక ప్రకటన

జాతీయ జనాభా జాబితా (ఎన్‌పీఆర్) విషయమై పశ్చిమ బెంగాల్ లాంటి రాష్ట్రాలతోపాటు విపక్షాలు అభ్యంతరాలు వ్యక్తం చేస్తున్న వేళ.. కేంద్ర హోం శాఖ బుధవారం కీలక ప్రకటన చేసింది. ఎన్‌పీఆర్‌ను అప్డేట్ చేయడం కోసం ఎలాంటి ధ్రువపత్రాలు అడగబోమని లేదా బయోమెట్రిక్ తీసుకోబోమని హోం శాఖ స్పష్టం చేసింది. ఎన్‌పీఆర్ ప్రక్రియ కోసం ప్రశ్నలతో రూపొందించిన ఫారాన్ని త్వరలోనే కొలిక్కి తెస్తామని హోం మంత్రిత్వ శాఖ అధికారులు తెలిపారు.

కానీ రిజిస్ట్రార్ జనరల్ అండ్ సెన్సస్ కమిషనర్ ఆఫీస్ వెబ్‌సైట్లో ఉన్న సమాచారం ప్రకారం పేరు, వయసు, జాతీయత తదితర వివరాలతోపాటు బయోమెట్రిక్ వివరాలను ఎన్‌పీఆర్ డేటాబేస్‌ కలిగి ఉంటుంది. ‘దేశంలో నివసించే వ్యక్తుల సమగ్ర గుర్తింపు డేటాబేస్‌ను రూపొందించడమే ఎన్‌పీఆర్ ఉద్దేశమని.. అందులో ప్రజల వివరాలతోపాటు బయోమెట్రిక్ వివరాలు కూడా ఉంటాయ’ని ఆ వెబ్‌సైట్ చెబుతోంది.

గత ఆరు నెలలు లేదంటే అంత కంటే ఎక్కువ కాలం ఒకే ప్రాంతంలో నివసించిన వ్యక్తిని లేదా వచ్చే ఆరు నెలల కాలంలో నివసించాలని భావించే వ్యక్తిని ఆ ప్రాంత నివాసిగా ఎన్‌పీఆర్ కోసం పరిగణిస్తారు. అసోం మినహా మిగతా అన్ని రాష్ట్రాలు, కేంద్రపాలిత ప్రాంతాల్లో 2020 ఏప్రిల్- సెప్టెంబర్ నెలల మధ్య ఎన్‌పీఆర్ ప్రక్రియను నిర్వహిస్తారు.

‘‘పౌరసత్వ చట్టం 1955, సిటిజన్ షిప్ రూల్స్ 2003 ప్రకారం గ్రామం, డివిజన్, జిల్లా, రాష్ట్ర, జాతీయ స్థాయుల్లో ఎన్‌పీఆర్‌ను రూపొందిస్తారు. ఈ చట్టం ప్రకారం ప్రతి భారతీయుడి వివరాలను నమోదు చేసి జాతీయ గుర్తింపు కార్డు జారీ చేయాలి. ఈ చట్టాన్ని ఉల్లంఘించిన వారికి రూ.1000 వరకు ఫైన్ విధించేలా రూల్స్ ఉన్నాయి. 2011 జనాభా లెక్కలతోపాటుగా 2010లో చివరిసారిగా ఎన్‌‌పీఆర్ డేటాను సేకరించారు. ఇంటింటా సర్వే చేసి 2015లో అప్డేట్ చేశారు. 2015లో రిజిస్టర్‌ను అప్డేట్ చేసే సమయంలో ప్రభుత్వం ఆధార్, మొబైల్ నంబర్ లాంటి వివరాలను సేకరించింది’’ అని ఓ అధికారి తెలిపారు.