పాత బంగారం, వాహనాల అమ్మకంపై పన్నులేదు

ఎవరైనా వ్యక్తులు తమ వద్ద ఉన్న పాత బంగారం, వాహనాలను విక్రయిస్తే వాగటిపై వస్తు, సేవల పన్ను (జీఎస్‌టీ) వర్తించదని రెవెన్యూ విభాగం స్పష్టం చేసింది. వ్యాపారం కోసం వీటిని విక్రయించరు కాబట్టి, వీటిపై జీఎస్‌టీ ఉండదని తెలిపింది. బంగారం వర్తకులు వ్యక్తుల నుంచి బంగారు ఆభరణాలు కొనుగోలు చేస్తే.. 3 శాతం జీఎస్‌టీ వర్తిస్తుందని రెవెన్యూ కార్యదర్శి హస్ముఖ్‌ అధియా బుధవారం పేర్కొన్నారు. దీనిపై మీడియాలో వార్తలు రావడంతో రెవెన్యూ శాఖ స్పందించింది. వ్యక్తులు వ్యాపారంలో భాగంగా ఆభరణాలు విక్రయించడం లేదు కాబట్టి జీఎస్‌టీ వర్తించదని స్పష్టం చేసింది.

అలాగే వ్యక్తుల వద్ద ఉన్న పాత కార్లు, బైకులు విక్రయించినా జీఎస్టీ వర్తించదని స్పష్టం చేసింది. వ్యాపారం కోసం రిజిస్టర్ చేయించుకున్న సంస్థలు పాత కార్లు, బైకులు విక్రయిస్తే పన్ను వర్తిస్తుందని చెప్పింది. అలాగే ఒక అన్‌రిజిస్టర్డ్ సప్లయర్.. రిజిస్టర్డ్ సప్లయర్‌కు పాత బంగారం విక్రయిస్తే వాటిపై జీఎస్టీ పడుతుందని వెల్లడించింది.