లాక్‌డౌన్‌ పరిష్కారం కాదు.. గోవా సీఎం ఆసక్తికర వ్యాఖ్యలు

కరోనా మరోమారు విజృంభిస్తుండడంతో రాష్ట్రాలు లాక్‌డౌన్ దిశగా పయనిస్తున్నాయి. ఇప్పటికే దేశ రాజధాని ఢిల్లీ, కోవిడ్ కేసులు విపరీతంగా పెరిగిపోతున్న మహారాష్ట్రలో పాక్షికంగా నిషేధాజ్ఞలు అమల్లోకి వచ్చాయి. అయితే ఆ పొరుగునే ఉన్న గోవా సీఎం ప్రమోద్ సావంత్ మాత్రం లాక్‌డౌన్‌పై ఆసక్తికర వ్యాఖ్యలు చేశారు. ఇకపై లాక్‌డౌన్ విధించడం తమ వల్ల కాదంటూ పరోక్ష వ్యాఖ్యలు చేశారు.

లాక్‌డౌన్ కారణంగా ఆర్థిక ఇబ్బందులు తప్పవని సావంత్ అభిప్రాయపడ్డారు. గతేడాది ఇదే సమయంలో నెలకొన్న పరిస్థితులను ఆయన గుర్తు చేశారు. లాక్‌డౌన్ కారణంగా జీఎస్టీ వసూళ్లు పడిపోయాయి. టూరిజం, పరిశ్రమలు దెబ్బతిన్నాయని ఆయన చెప్పారు. ఇప్పుడిప్పుడే రాష్ట్రం గాడిన పడుతోందని.. ఇలాంటి సమయంలో లాక్‌డౌన్ విధించబోమని ఆయన స్పష్టం చేశారు.

పొరుగు రాష్ట్రాలైన మహారాష్ట్ర, కర్ణాటకలో నమోదవుతున్న కరోనా కేసులపై అప్రమత్తంగా ఉన్నామని.. ఎప్పటికప్పుడు చర్యలు చేపడుతున్నామని సావంత్ అన్నారు. అయినా కరోనా కట్టడికి లాక్‌డౌన్ ఒక్కటే పరిష్కారం కాదన్న ఆయన.. కోవిడ్ నిబంధనలను తూ.చా తప్పకుండా పాటించడం, కరోనా వ్యాక్సినేషన్‌తోనే నియంత్రణ సాధ్యమని సావంత్ చెప్పుకొచ్చారు.

Also Read: