అనుమతి లేకుండా మహిళను తాకితే నేరం: కోర్టు

ఓ మహిళ అనుమతి లేకుండా ఆమెను తాకరాదని, ఇలా చేయడం తీవ్రమైన నేరమని ఢిల్లీ హైకోర్టు సంచలన తీర్పును వెలువరించింది. అనుకోకుండా మహిళను తాకినా దురదృష్టవశాత్తూ ఆమె లైంగిక వేధింపుల బాధితురాలిగా మారుతుందని న్యాయస్థానం వ్యాఖ్యానించింది. తొమ్మిదేళ్ల బాలికపై లైంగిక వేధింపుల కేసులో పై విధంగా స్పందించిన న్యాయస్థానం నిందితుడు రామ్‌కు ఐదేళ్ల జైలు శిక్షను విధించింది. ఉత్తర్‌ప్రదేశ్‌కు చెందిన నిందితుడు చావీ రామ్ ఉత్తర ఢిల్లీలోని ముఖర్జీ‌నగర్ మార్కెట్‌లో మైనర్ బాలిక పట్ల అసభ్యకరంగా ప్రవర్తించాడు. 2014లో జరిగిన ఈ ఘటనపై ఢిల్లీ కోర్టు అదనపు న్యాయమూర్తి సీమా మైనీ నిందితుడికి జైలు శిక్ష విధిస్తూ తీర్పును వెలువరించారు.

అంతేకాదు ఓ మహిళకు తన శరీరంపై పూర్తి హక్కు ఉందని, ఆమె అనుమతి లేకుండా తాకే అధికారం ఎవరికీ లేదని, ఇది నిషేధమని న్యాయమూర్తి పేర్కొన్నారు. ఇలా వ్యవహరిస్తే మహిళ స్వేచ్ఛకు భంగం కలిగినట్లేనని జడ్జ్ అభిప్రాయపడ్డారు. మహిళలను లైంగికంగా వేధించి, పురుషులు సంతృప్తి చెందుతున్నారని, ఇది వారి వ్యక్తిగత హక్కును హరించివేయడమేనని అన్నారు. ఈ కేసులో నిందితుడికి అయిదేళ్ల జైలు శిక్షతోపాటు రూ.10,000 జరిమానా విధించారు. అలాగే బాధిత బాలికకు రూ.50,000 చెల్లించాలని ఢిల్లీ స్టేట్ లీగల్ సర్వీస్ అథారిటీకి సూచించింది.

అత్యంత వేగంగా అభివృద్ధి చెందుతూ, సాంకేతికంగా బలంగా ఉన్న భారత్ లాంటి దేశంలో దురదృష్టవశాత్తూ మహిళలు, మైనర్ బాలికలపై లైంగిక వేధింపులకు పాల్పడటం, ముఖ్యంగా రద్దీ మార్కెట్లు, ప్రజా రవాణా, సినిమా హాళ్లలో ఇవి నిత్య కృత్యంగా మారిపోవడం బాధాకరమని న్యాయమూర్తి ఆవేదన వ్యక్తం చేశారు. 2014 సెప్టెంబరు 25 న రద్దీగా ఉన్న మార్కెట్లో నిందితుడు రామ్ తన తల్లి వెంట ఉన్న బాధిత బాలికను అసభ్యంగా తాకుతా, లైంగిక వేధింపులకు పాల్పడ్డాడు. ఈ విషయాన్ని బాలిక తన తల్లికి వెంటనే తెలపడంతో పారిపోవడానికి ప్రయత్నించిన నిందితుడిని స్థానికులు సాయంతో అతడిని పట్టుకుని పోలీసులకు అప్పగించారు.