Third Front ఊసే లేదు.. బీజేపీని ఓడించేది ఒకటే ఫ్రంట్: కుండబద్దలు కొట్టిన నితీశ్

భారత మాజీ ఉప-ప్రధాని దేవీలాల్ జయంతిని పురస్కరించుకుని హరియాణాలో ఇండియన్ నేషనల్ లోక్‌దళ్ (INLD) నిర్వహించిన సమ్మాన్ దివాస్ (Samman Diwas) ర్యాలీకి బిహార్ సీఎం నితీశ్ కుమార్ (Nitish Kumar), డిప్యూటీ సీఎం తేజస్వీ యాదవ్ (Tejshwi Yadav), ఎన్‌సీపీ అధినేత శరద్ పవార్ (Sharad Pawar), సీపీఎం నేత సీతారాం ఏచూరీ (Sitram Yechuri) సహా పలువురు ప్రతిపక్ష పార్టీల నాయకులు హాజరయ్యారు. ఈ సందర్భంగా నితీశ్ కుమార్ మాట్లాడుతూ.. వచ్చే ఎన్నికల్లో కేంద్రంలోని బీజేపీని ఓడించడానికి ప్రతిపక్షాలన్నీ ఏకతాటికిపై రావాల్సిన అవసరం ఉందని పిలుపునిచ్చారు. కాంగ్రెస్, కమ్యూనిస్ట్‌లు సహా ప్రతిపక్ష పార్టీలన్నీ కలిస్తే 2024 సాధారణ ఎన్నికల్లో బీజేపీకి ఓటమి తప్పదని నితీశ్ స్పష్టం చేశారు. అంతేకాదు, మూడో కూటమి (Third Front) ప్రశ్నే లేదని, 2024లో కాషాయ పార్టీని ఓడించడానికి ఉన్నది ఒకే ఒక ఫ్రంట్ అని స్పష్టం చేశారు.బీజేపీయేతర పార్టీలన్నీ ఏకమైతే దేశాన్ని నాశనం చేసేందుకు పని చేస్తున్న వారిని తరిమికొట్టగలమని.. హిందువులు, ముస్లింల మధ్య ఎలాంటి గొడవలు లేవని, అల్లర్లు సృష్టించేందుకు బీజేపీ ప్రయత్నిస్తోందని నితీశ్ ఆరోపించారు. ‘‘జాతీయ స్థాయిలో మనమంతా ఒక్కతాటిపైకి రావాలన్నదే నా కోరిక.. మరిన్ని పార్టీలను ఏకతాటిపైకి తీసుకురావాలి’’ అని అన్నారు. అంతేకాదు, ప్రధాని రేసులో తాను లేనని మరోసారి నితీశ్ కుమార్ పునరుద్ఘాటించారు.

2024 లోక్‌సభ ఎన్నికలకు ముందు థర్డ్ ఫ్రంట్ కోసం బల ప్రదర్శనలో భాగంగా సమ్మాన్ ర్యాలీకి ప్రతిపక్ష నాయకులను (ఐఎన్ఎల్‌డీ) ఆహ్వానించింది. ఈ ర్యాలీకి నితీశ్ కుమార్, శరద్ పవార్, కేసీ త్యాగి, సీతారాం ఏచూరి, తేజస్వీ యాదవ్, ఫరూక్ అబ్దుల్లా, శివసేన నేత అరవింద్ సావంత్‌, ఎస్ఏడీ నుంచి సుఖ్‌బీర్ సింగ్ బాదల్ సహా ప్రతిపక్ష అగ్రనేతలు హాజరయ్యారు.

జేడీయూ నేత కేసీ త్యాగి మాట్లాడుతూ.. 2024 లోక్‌సభ ఎన్నికలకు ముందు అధికార బీజేపీకి వ్యతిరేకంగా భావసారూప్యత కలిగిన శక్తుల ఏకీకరణకు గుర్తుగా ఇదొక చారిత్రాత్మక సమావేశమని అన్నారు. అయితే, ఈ ర్యాలీకి కాంగ్రెస్ గైర్హాజరయ్యింది. హరియాణాలో INLD, కాంగ్రెస్ బద్ధ శత్రువులు. అయితే రాష్ట్రంలోనూ, కేంద్రంలోనూ బీజేపీ నిలువరించడానికి కాంగ్రెస్‌తో చేతులు కలపడానికి తాము కూడా సిద్ధంగా ఉన్నట్లు ఎన్‌ఎల్‌డీ పేర్కొంది.