రాత్రి 10 నుంచి ఉదయం 6 వరకు వాట్సాప్ బంద్!

మరికొద్ది రోజుల్లో రాత్రి 10 గంటల నుంచి ఉదయం 6 గంటల వరకు వాట్సాప్ ద్వారా సందేశాలు పంపకూడదు. ఈ షరతు చూసి షాకయ్యారా? డోన్ట్ వర్రీ.. ఈ నిబంధన వినియోగదారులకు కాదు, రాజకీయ పార్టీల కోసం. ఎన్నికల సీజన్ ముంచుకొస్తున్న నేపథ్యంలో భారత ఎన్నికల సంఘం (ఈసీఐ) ఈ కొత్త నిబంధన తెస్తోంది.

ఈ మేరకు ఈసీఐ వివిధ రాష్ట్రాలు, కేంద్ర పాలిత ప్రాంతాలకు సూచనలు జారీ చేసింది. ఇప్పటికే రాత్రి 10 గంటలు దాటితే ఎక్కడా ఎన్నికల ప్రచారం నిర్వహించకూడదనే ప్రచారం ఉన్న సంగతి తెలిసిందే. ఈసీఐ జారీ చేసిన తాజా సూచనల్లో ఎన్నికల ప్రచారానికి సంబంధించి.. ఇంటింటి ప్రచారం, ఎస్సెమ్మెస్, వాట్సాప్, ఫోన్ కాల్స్‌కు కూడా ఈ నిబంధన వర్తిస్తుందని వెల్లడించింది.

ప్రజల వ్యక్తిగత జీవితానికి భంగం వాటిల్లకుండా గౌరవించడం తప్పనిసరని, రాత్రి 10 తర్వాత వారికి అభ్యర్థుల నుంచి ప్రజలకు ఎలాంటి ఇబ్బందులు తలెత్తకుండా చర్యలు తీసుకుంటామని ఈసీఐ ఈ సందర్భంగా పేర్కొంది. అభ్యర్థులు ఎన్నికల ప్రచారంలో ప్లాస్టిక్ లేదా పాలిథిన్ వస్తువులను వినియోగించరాదని, అనుమతి లేకుండా ఎక్కడపడితే అక్కడ బ్యానర్లు, సైన్ బోర్డులు ఏర్పాటు చేయడంపై పరిమితులు విధిస్తున్నామని వెల్లడించింది.