సైకిల్‌పై అనుసరించి.. యువతిని అసభ్యంగా తాకి.. యువకుడికి ఊహించని షాక్!

నోయిడా: పెట్రోల్ బంకులో పని చేసే ఓ యువతి రోడ్డు వెంబడి నడుచుకుంటూ వెళ్తుండగా.. సైకిల్ మీద వచ్చిన ఓ వ్యక్తి నడి రోడ్డుపై ఆమెను అనుచితంగా తాకాడు. వెంటనే అక్కడి నుంచి ఉడాయించే ప్రయత్నం చేశాడు. కానీ అతడిని వెంటాడిన ఆ యువతి.. దొరకబట్టుకొని జనాలందరూ చూస్తుండగానే చితకబాదింది. తర్వాత అతడు సారీ చెప్పినా.. ఈలోపే ఆమె తగిన బుద్ధి చెప్పింది. నోయిడాలో జరిగిన ఈ ఘటన వివరాల్లోకి వెళ్తే..

వీరా (పేరు మార్చాం) అనే యువతి నోయిడా సెక్టార్ 12లోని ఓ పెట్రోల్ బంకులో పని చేస్తోంది. శుక్రవారం ఉదయం బంకులో పని కోసం రోడ్డు పక్కన నడుచుకుంటూ వెళ్తుండగా.. సైకిల్ మీద వచ్చిన ఓ యువకుడు ఆగుతూ.. వస్తూ... ఆమెను ఫాలో అయ్యాడు.

సహారా రెడ్ లైట్ ఏరియాకు వీరా చేరుకుంటుండగానే.. నడిరోడ్డుపై అతడు వీరాను అసభ్యంగా తాకి సైకిల్ మీద పారిపోయే ప్రయత్నం చేశాడు. సరిగ్గా అదే సమయంలో చేరువగా ఓ కారు రావడంతో.. ఆమెకు పక్కకు తప్పుకోవడం కూడా కుదర్లేదు.

సైక్లిస్ట్ చేసిన పనికి వీరాకు చిర్రెత్తుకొచ్చింది. నడి రోడ్డు మీద తనతో అనుచితంగా ప్రవర్తించిన అతడిపై సివంగిలా దూకింది. వెంటాడి.. పట్టుకొని చెంపలు పగలగొట్టింది. దీంతో అక్కడ జనం పోగయ్యారు. కొందరు వీడియో తీయగా.. మరికొందరు అతణ్ని కొట్టొద్దని వారించారు.

తర్వాత ఆ సైక్లిస్ట్ వీరాకు సారీ చెప్పి వెళ్లిపోయాడు. తాను ఇక్కడ ఆరేళ్లుగా ఉంటున్నానని.. కానీ ఇంతకు ముందు ఎప్పుడూ తనకు ఇలాంటి చేదు అనుభవం ఎదురు కాలేదని ఆమె తెలిపింది. ఈ ఘటనపై సమాచారం అందుకున్న పోలీసులు వీరా నుంచి వివరాలు సేకరించారు. ఆమెతో అనుచితంగా ప్రవర్తించిన వ్యక్తిపై కేసు నమోదు చేేస్తామన్నారు.