ఈశాన్యం అభివృద్ధితోనే భారత్‌ వృద్ధి వేగవంతం: మోదీ

ఈశాన్య రాష్ట్రాల అభివృద్ధితోనే భారత వృద్ధి వేగవంతం అవుతుందని ప్రధాని నరేంద్ర మోదీ అన్నారు. శనివారం (ఫిబ్రవరి 3) ఆయన అసోంలోని గువాహటిలో ప్రపంచ పెట్టుబడిదారుల సదస్సు (గ్లోబల్‌ ఇన్వెస్టర్స్‌ సమ్మిట్‌-2018)ను ప్రారంభించారు. అనంతరం మాట్లాడుతూ.. ‘ఈ సదస్సు ట్యాగ్‌లైన్‌ ఓ పెద్ద సందేశాన్నిస్తోంది. అడ్వాంటేజ్‌ అసోం: ఇండియా ఎక్స్‌ప్రెస్‌ వే టు ఆసియాన్‌.. ఇది ఒక ప్రకటన మాత్రమే కాదు. ఓ దృక్పథం. ఆసియాన్‌ దేశాలతో భారత్‌ సంబంధాలు మరింత బలోపేతం అవుతున్నాయి’ అని అన్నారు.

తమ ప్రభుత్వం యాక్ట్‌ ఈస్ట్‌ పాలసీని రూపొందించిందని.. ఈశాన్య రాష్ట్రాలే దీనికి బలమని మోదీ పేర్కొన్నారు. ఈశాన్య రాష్ట్రాలు, ఇక్కడి ప్రజలు అభివృద్ధి చెందినప్పుడే భారత వృద్ధి కూడా వేగవంతమవుతుందన్నారు. అనంతరం అక్కడ ఏర్పాటు చేసిన ప్రదర్శనను తిలకించారు. ఈ సదస్సులో మోదీతో పాటు భూటాన్‌ ప్రధాని కూడా పాల్గొన్నారు.