కావేరీ నీటిని వదలలేం : కర్ణాటక సీఎం

కావేరీ నీటి వివాదం కర్ణాటక, తమిళనాడు మధ్య చిచ్చుపెట్టింది. సుప్రీం కోర్టు కావేరీ జలాలు తమిళనాడుకు వదలాల్సిందేనని ఆదేశించినప్పటికీ కర్ణాటక ప్రభుత్వం పెడచెవిన పెడుతోంది. ఇప్పటి పరిస్థితుల్లో నీరు వదలలేమని కర్ణాటక సీఎం సిద్ధరామయ్య మళ్లీ తెలిపారు. బుధవారం రాత్రి బెంగళూరులో మీడియాతో మాట్లాడిన ఆయన తాము నీళ్లు వదిలే పరిస్థితుల్లో లేమని అన్నారు. గురువారం ఢిల్లీలో కేంద్ర జలవనరుల శాఖ మంత్రి ఆధ్వర్యంలో జరిగే సమావేశంలో తుది నిర్ణయం చెబుతామన్నారు. సుప్రీం కోర్టు ఆదేశాల మేరకు తమిళనాడు, కర్ణాటక సీఎంలతో కేంద్రం మాట్లాడి వివాదాన్ని సద్దుమణిగేలా చేయాలని భావిస్తోంది. ఆ సమావేశానికి సంబంధించిన నివేదికను శుక్రవారం సాయంత్రం కల్లా సుప్రీంకోర్టులో సబ్మిట్ చేయబోతోంది.

సుప్రీంకోర్టు తన తాజా తీర్పులో ఈ నెల 30 వరకు మూడు రోజుల పాటూ రోజుకు 6 వేల క్యూసెక్కుల చొప్పున నీళ్లు విడుదల చేయాలని ఆదేశించింది. దానిని కర్ణాటక పాటించలేదు. అత్యున్నత ధర్మాసనం తీర్పును పాటించకుండా, వేరే రాష్ట్రంతో తగాదా పెట్టుకునే హక్కు ఏ రాష్ట్రానికి లేదని ఘాటుగా వ్యాఖ్యానించింది కూడా. అయినా కర్ణాటక ప్రభుత్వం నీళ్లు విడుదల చేయలేదు.