ఒక్క ఇ-మెయిల్‌తో.. ‘నల్లధనం’ భరతం పట్టండి!

ఎవరైనా ‘నల్లధనం’ దాచి పెట్టిన సమాచారం మీ వద్ద ఉందా? అవినీతి బ్యాంకర్లు కొత్త నోట్లను భారీ మొత్తంలో అక్రమంగా తరలిస్తున్నట్లు తెలిసిందా? అయితే.. వెంటనే ‘ఈ-మెయిల్’ చేయండి.

ఔను, నల్లధనం కుబేరుల ఆట కట్టించేందుకు ప్రభుత్వం కొత్తగా ‘ఈ-మెయిల్’ ఐడీని అందుబాటులోకి తెచ్చింది. బ్లాక్ మనీపై ఎటువంటి సమాచారం ఉన్న తమకు అందివ్వాలని పేర్కొంది. అలాగే, దొడ్డిదారిన కొత్త నోట్లను తరలిస్తున్న బ్యాంకు ఉద్యోగులు, బ్రోకర్ల గురించి సమాచారం ఉన్నా.. తమకు వెంటనే మెయిల్ చేయండని ప్రభుత్వం ప్రకటించింది.

రెవెన్యూ కార్యదర్శి హస్ముఖ్ అధియా శుక్రవారం ఈ ప్రకటన విడుదల చేశారు. ఎవరైనా తమ వద్ద ఉన్న బ్లాక్ మనీని అక్రమ మార్గాల్లో వైట్‌గా మార్చుకునేందుకు ప్రయత్నిస్తున్నట్లు తెలిస్తే వెంటనే తమకు సమాచారం ఇవ్వాలన్నారు. ఈ సమాచారం ఇచ్చినవారి విషయాన్ని గోప్యంగా ఉంచుతామని, వారి వివరాలను గానీ, ఈ-మెయిల్ చిరునామాను గానీ బయట పెట్టమని తెలిపారు. ఇంకెందుకు ఆలస్యం మీ వద్ద ఆ సమాచారం ఉంటే వెంటనే.. blackmoneyinfo@incometax.gov.in కు మెయిల్ చేయండి.