దేశమంతటా NRC.. అమిత్ షా కీలక ప్రకటన

దేశమంతటా ఎన్ఆర్సీసీ నిర్వహిస్తామని హోం మంత్రి అమిత్ షా స్పష్టం చేశారు. బుధవారం రాజ్య సభలో మాట్లాడిన ఆయన.. మతాన్ని బట్టి వివక్ష చూపడం అనేది ఉండదన్నారు. పాకిస్థాన్, బంగ్లాదేశ్, అప్ఘానిస్థాన్‌లలో వేధింపులకు గురై.. తలదాచుకోవడం కోసం భారత్ వచ్చిన హిందువులు, బౌద్ధులు, జైనులు, క్రైస్తవులు, సిక్కులు, పార్శీలకు భారత పౌరసత్వం కల్పిస్తామన్నారు. దేశమంతటా నేషన్ రిజిస్టర్ ఆఫ్ సిటిజన్స్ (ఎన్ఆర్సీ) చేపడతామని ఉద్ఘాటించారు. ఈ విషయంలో ఏ మతస్థులు భయపడాల్సిన అవసరం లేదన్నారు.

అన్ని మతాలకు చెందిన భారత పౌరులకు ఎన్ఆర్సీ జాబితాలో చోటు కల్పిస్తామని అమిత్ షా తెలిపారు. ఎలాంటి వివక్ష ప్రదర్శించబోమన్నారు. ఎన్ఆర్సీ, పౌరసత్వ సవరణ బిల్లు రెండు వేర్వేరన్నారు. సుప్రీం కోరు ఆదేశాల మేరకు అసోంలో ఎన్ఆర్సీని చేపట్టారని చెప్పిన అమిత్ షా.. ఎన్ఆర్సీని దేశమంతా చేపట్టే సమయంలో.. అసోంలోనూ నిర్వహిస్తామన్నారు.

అసోం వ్యాప్తంగా ట్రైబ్యునల్స్ ఏర్పాటు చేస్తామని.. ఎన్ఆర్సీ జాబితాలో పేరు లేని వారు ట్రైబ్యునల్‌కు వెళ్లే హక్కు ఉందని హోం మంత్రి తెలిపారు. ట్రైబ్యునల్‌కు వెళ్లే ఆర్థిక స్థోమత లేని వారికి అసోం ప్రభుత్వమే లాయర్‌ ఫీజులకు అయ్యే ఖర్చులను భరిస్తుందన్నారు.