మహిళా మంత్రి హ్యాండ్ బ్యాగ్ కొట్టేసిన దొంగలు!

దొంగలకు ఛాన్స్ దొరికితే ఎదుటివారు ఎంతటివారైతేనేం.. తమదైన చోర కళా నైపుణ్యంతో ఇట్టే కంగుతినిపిస్తారు. తాజాగా ఏకంగా ఓ రాష్ట్ర మంత్రే అలాంటి చోరుల బారిన పడ్డారు. అవును.. పూరి-దుర్గ్‌ ఇంటర్‌సిటీ ఎక్స్‌ప్రెస్‌లో ప్రయాణిస్తున్న ఒడిశా మంత్రి ఉషా దేవి హ్యాండ్‌బ్యాగ్‌ను దొంగలు తస్కరించారు. దీనిపై ఆమె రైల్వే పోలీసులకు ఫిర్యాదు చేశారు. రైరఖోల్‌- అంగుల్‌ స్టేషన్ల మధ్య హ్యాండ్‌ బ్యాగ్‌ అపహరణకు గురైనట్లు ఆమె తెలిపారు. ఆమె భువనేశ్వర్‌ నుంచి రైలులో మరో ప్రాంతానికి ప్రయాణిస్తుండగా ఈ ఘటన జరిగింది.

హ్యాండ్‌ బ్యాగ్‌లో రూ.25000 నగదు, మొబైల్‌ ఫోన్‌, ఐడీ కార్డుతో పాటు మరికొన్ని విలువైన వస్తువులు ఉన్నట్లు ఉషా దేవి తెలిపారు. మంత్రి ఫిర్యాదు మేరకు ఎఫ్‌ఐఆర్‌ నమోదు చేసి దర్యాప్తు చేస్తున్నట్లు తితాల్‌గఢ్‌ జీఆర్‌పీ పోలీసులు తెలిపారు.