స్టేషన్‌పై ఉగ్రవాదుల గ్రెనేడ్ దాడి.. పోలీసు దుర్మరణం

జమ్మూ కశ్మీర్లో ఉగ్రవాదుల ఆగడాలు తగ్గడం లేదు. షోపియాన్ జిల్లాలో ఆదివారం ఉగ్రదాడిలో ఓ పోలీసు ప్రాణాలు కోల్పోయాడు. పోలీస్ స్టేషన్‌పై గ్రెనేడ్ విసిరిన ఉగ్రవాదులు కాల్పులకు తెగబడ్డారు. గ్రెనేడ్ దాడిలో ఓ పోలీస్ గాయపడగా.. వెంటనే సమీపంలోని హాస్పిటల్‌కు తరలించారు. చికిత్స పొందుతూ ఆయన ప్రాణాలు వదిలారు. అమరుడైన పోలీసును జవూరాకు చెందన షకీబ్ మోహివుద్దీన్‌గా గుర్తించారు. వెంటనే అప్రమత్తమైన భద్రతా దళాలు.. ఎదురు కాల్పులు ప్రారంభించాయి.

దాడికి పాల్పడిన ఉగ్రవాదులు సమీపంలోని అడవిలోకి పారిపోయారని భద్రతాదళాలు తెలిపాయి. ఆ ప్రాంతాన్ని తమ అదుపులోకి తీసుకున్న భద్రతా సిబ్బంది.. ఉగ్రవాదుల జాడ కోసం జల్లెడ పడుతున్నారు.

కశ్మీర్ పోలీసులు వెంటనే ఉద్యోగాలు వదిలిపెట్టాలని, లేదంటే చంపేస్తామని ఉగ్రవాదులు హెచ్చరిస్తోన్న సంగతి తెలిసిందే. ఇళ్ల నుంచి నలుగురు పోలీసుల్ని ఎత్తుకెళ్లిన ముష్కరులు ఇటీవలే ముగ్గుర్ని దారుణంగా హతమార్చడం కశ్మీర్లో కలకలం రేపింది.