వాళ్లను గెంటేస్తేనే చర్చలు: పన్నీరు వర్గం

శశికళ కుటుంబ సభ్యును పార్టీ నుంచి గెంటేస్తేనే చర్చల ప్రక్రియ ముందుకు సాగుతుందని తమిళనాడు మాజీ సీఎం ఓ పన్నీరుసెల్వం శిబిరం అన్నాడీఎంకే (అమ్మ) వర్గానికి స్పష్టం చేసింది. ఇందుకు అన్నాడీఎంకే ప్రధాన కార్యదర్శిగా శశికళ, డిప్యూటీ ప్రధాన కార్యదర్శి టీటీవీ దినకరన్ లు ఎన్నికైనట్లు ఎన్నికల సంఘానికి సమర్పించిన అఫిడవిట్ ను ఉప సంహరించుకోవాలని సూచించింది.

దీంతో పాటు జయలలిత మరణంపై పళనిసామి ప్రభుత్వం సీబీఐ విచారణ కోరుతూ కేంద్రప్రభుత్వంపై ఒత్తిడి తేవాలని ఓపీఎస్ వర్గం షరతు విధించింది.

‘పార్టీ నుంచి శశికళ, దినకరన్ లను బహిష్కరిస్తున్నట్లు అధికారికంగా ప్రకటించాలి. పార్టీ క్యాడర్ లో ఏ ఒక్కరూ ఆమె కుటుంబంతో ఏలాంటి సంబంధాలు పెట్టుకోరాదు’ అని ఓపీఎస్ టీంలోని నేత కేపీ మునుస్వామి స్పష్టం చేశారు.

జయలలిత మరణంపై అనుమానాలున్న రీత్యా సీబీఐ చేత దర్యాప్తు చేయించాలన్న డిమాండ్ లో ఏమాత్రం వెనుకడుగు వేసేది లేదని ఆయన తెలిపారు. ఈ షరతులకు అంగీకరిస్తే చర్చలకు సిద్ధమవుతామని ఆయన విస్పష్టంగా చెప్పారు.

పళనిసామి సీఎంగా కొనసాగుతారని, శశికళ ఆమె కుటుంబ సభ్యులను ఓపీఎస్ ఒత్తిడి మేరకు పార్టీ నుంచి బహిష్కరించడం లేదని లోక్ సభ డిప్యూటీ స్పీకర్ తంబిదురై వెల్లడించిన నేపథ్యలో ఓపీఎస్ టీం గుర్రుగా ఉంది.

గురువారం ఓపీఎస్ ఎంపీ, ఎమ్మెల్యేలతో బిజీబిజీగా గడిపారు. ఆ తరువాత ఈ షరతులు విధించారు. ఓపీఎస్ షరతులపై అన్నాడీఎంకే (అమ్మ) నుంచి ఏలాంటి స్పందన రాలేదు.