పన్నీరుకు పెరుగుతున్న మద్దతు

అన్నాడీఎంకే ప్రధాన కార్యదర్శి వీకే శశికళపై తిరుగుబాటు చేసిన తమిళనాడు అపద్ధర్మ ముఖ్యమంత్రి ఓ పన్నీర్ సెల్వంకు రోజురోజుకు మద్దతు పెరుగుతోంది. పార్టీ ఎమ్మెల్యేగా...వివిధ వర్గాలు ఆయనకు బాసటగా నిలుస్తున్నాయి. అధికారాన్ని చేజిక్కించుకోవడంలోభాగంగా శశికళ పథకం ప్రకారమే రాష్ట్రవ్యాప్తంగా తన మద్దతుదారులను నిర్వాహకులుగా నియమించిందని సేలంలో జయ మేనకోడలు దీప మద్దతుదారులు ఆరోపించారు.

దీప మద్దతుదారుల్లో ఒకరైన మాజీ ఎమ్పీ అర్జునన్‌ మీడియాతో మాట్లాడుతూ.. ప్రస్తుత రాజకీయ పరిణామాల నేపథ్యంలో ముఖ్యమంత్రి పన్నీర్‌ సెల్వం దీపకు పిలుపునివ్వడం ఆహ్వానించదగిన పరిణామం అన్నారు. అన్నాడీఎంకే నుంచి శశికళను వెళ్లగొట్టేంత వరకు తమ పోరాటం ఆపబోమని చెప్పారు. పన్నీర్‌ సెల్వం మద్దతుదారులతో కలిసి పని చేస్తామన్నారు.

కాగా, గురువారం మధ్యాహ్నం చెన్నై రానున్న గవర్నర్ సిహెచ్ విద్యాసాగర్ రావును శశికళ కలువనున్నారు. తనకు మద్దతుగా నిలిచిన ఎమ్మెల్యేల జాబితాను ఆయనకు ఇచ్చి...తనతో ప్రమాణ స్వీకారం చేయించాలని కోరనున్నారు. ఉదయం జరిగిన సమావేశంలో 120మంది ఎమ్మెల్యేలు శశికళ శిబిరంలో ఉన్నారు.