పన్నీర్ సెల్వంకి పెరుగుతున్న మద్దతు

పన్నీర్ సెల్వంకి క్రమక్రమంగా మద్దతు మరింత పెరుగుతోంది. ఇప్పటికే పార్టీ సీనియర్ నేతలు, మంత్రులు, ఎంపీలు పన్నీర్‌కే తమ మద్దతు అని ప్రకటించగా తాజాగా ఎంజీఆర్‌కి విశ్వాసపాత్రుడిగా పేరున్న పొన్నైయన్ కూడా పన్నీర్ క్యాంపులో చేరిపోయారు. ఎంజీఆర్ ముఖ్యమంత్రిగా వున్న మూడు కేబినెట్‌లలో పొన్నైయన్ మంత్రిగా పనిచేశారు. ఇవాళ మధ్యాహ్నం చెన్నైలోని గ్రీన్‌వేస్ రోడ్‌లో వున్న పన్నీర్ నివాసానికి చేరుకున్న పొన్నైయన్.. పన్నీర్‌కి అమ్మ ఆశీర్వాదాలు ఉన్నాయని అన్నారు.

తమిళనాడు విద్యాశాఖ మంత్రి పాండ్యరాజన్, నమక్కల్ ఎంపీ పీఆర్ సుందరం, కృష్ణగిరి ఎంపీ అశోక్ కుమార్ వంటి అగ్ర నేతలు పొన్నైయన్ కన్నా ముందే పన్నీర్ సెల్వంకి తమ మద్దతు వుంటుందని ప్రకటించారు. వీళ్లేకాకుండా పార్టీ సీనియర్ నేతలు మధుసూదన్, రాజ్యసభ నేత వీ మైత్రేయన్, పార్టీ వ్యవస్థాపక నేత పీహెచ్ పాండ్యన్ వంటి వాళ్లు ముందునుంచే పన్నీర్ సెల్వంకి అండగా నిలిచారు.