నిరుద్యోగ యువతకు ఫ్రీ కోచింగ్ సెంటర్లు!!

ఉత్తర్‌ప్రదేశ్ ఎన్నికల్లో మెజార్టీ స్థానాలు దక్కించుకోడానికి అన్ని పార్టీలు సర్వశక్తులను ఒడ్డుతున్నాయి. అటు కాంగ్రెస్-సమాజ్‌వాదీ పార్టీ కూటమి, ఇటు భాజపా, మరో వైపు బీఎస్పీ ఓటర్లు ఆకట్టుకోడానికి ప్రయత్నిస్తున్నాయి. కాంగ్రెస్‌తో జట్టుకట్టిన అధికార ఎస్పీ తరఫున ఎన్నికల ప్రచారంలో పాల్గొన్న కాంగ్రెస్ ఉపాధ్యక్షుడు రాహుల్ గాంధీ ఓటర్లపై హామీల వర్షం కురిపించారు.

మా కూటమి అధికారంలోకి వస్తే యువత కోసం యూపీ వ్యాప్తంగా వివిధ పట్టణాల్లో ఉచిత కోచింగ్‌ కేంద్రాలను ఏర్పాటుచేస్తామని రాహుల్ గాంధీ ప్రకటించారు. యూపీలోని సీతాపూర్‌లో జరిగిన ఎన్నికల ప్రచారంలో పాల్గొన్న ఆయన ఎస్పీ-కాంగ్రెస్‌ కూటమికి ఓట్లేసి గెలిపించాలని కోరారు. పనిలో పనిగా ప్రధాని నరేంద్రమోడీపై విమర్శలు గుప్పించారు.

రైతుల రుణ మాఫీకి ఉత్తరప్రదేశ్‌లో ప్రభుత్వాన్ని ఏర్పాటుచేయాల్సిన అవసరం లేదన్నారు. మీరు ప్రధానమంత్రి హోదాలో తలచుకుంటే వాటిని వెంటనే మాఫీ చేయవచ్చని పేర్కొన్నారు. మరోసారి ప్రధాని తీరుపై విమర్శనాస్త్రాలు సంధించారు. మూడో దశ ఎన్నికల ప్రచారంలో పాల్గొన్న రాహుల్ గాంధీ ఓటర్లు ఆకట్టుకునే ప్రయత్నం చేశారు.