సిక్కింలో బస్సు బోల్తా... 22 మంది విద్యార్థులకు గాయాలు

కాలేజీ విద్యార్థులు ప్రయాణిస్తోన్న బస్సు సిక్కింలో గ్యాంగ్ టక్‌‌లో బోల్తా పడింది. అయితే ఎలాంటి ప్రాణ నష్టం సంభవించలేదు. ఈ ప్రమాదంలో జార్కండ్ రాంచీలోని సెయింట్ జేవియర్ కాలేజీకి చెందిన 22 మంది విద్యార్థులు గాయపడ్డారు. పోలీసులు తెలిపిన వివరాల ప్రకారం విద్యార్థులు సిక్కిం విహార యాత్రకు వెళ్లారు. వారు పశ్చిమ బెంగాల్‌లోని సిలిగురికి రాంచీకి తిరిగి వస్తుండగా రాణిపూల్ పోలీస్ స్టేషన్ పరిధిలోని ఏడో మైలు వద్ద వారి బస్సు అదుపు తప్పి బోల్తా పడింది.


ఈ ఘటనలో గాయపడిన విద్యార్థులను టాడాంగ్‌లోని సెంట్రల్ రిఫరల్ ఆస్పత్రికి తరలించినట్టు పోలీసులు తెలిపారు. అక్కడ వైద్యం అందిస్తున్నట్టు తెలుస్తుంది. ఈ విషయంపై సిక్కిం సీఎం ప్రేమ్ సింగ్ తమాంగ్‌తో మాట్లాడినట్టు జార్ఖండ్ ముఖ్యమంత్రి హేమంత్ సోరెన్ తెలిపారు. " విద్యార్థులు పర్యటనకు వెళ్లిన బస్సుకు ప్రమాదం జరిగినట్టు ఇప్పుడే తెలిసింది. నేను సిక్కిం సిఎంతో మాట్లాడాను. పిల్లల వైద్యం కోసం తగిన ఏర్పాట్లు జరుగుతున్నాయి. పిల్లలను విమానంలో తరలించేందుకు సిద్ధంగా ఉండాలని ఆర్సీని ఆదేశించాను. ప్రతికూల వాతావరణం కారణంగా ప్రస్తుతం అది చేయలేం. కాబట్టి విద్యార్థులకు మంచి చికిత్స అందించేందుకు ఏర్పాట్లు చేస్తున్నాం." అని జార్ఖండ్ ముఖ్యమంత్రి ఒక ట్వీట్‌లో పేర్కొన్నారు.