గోల్డెన్ బే రిసార్ట్స్ యజమానిదే పైచేయి!

ఓడలు బండ్లవుతాయి...బండ్లు ఓడలవుతాయి...ఈ సామెత మిగతా విషయాల్లో ఎలా ఉన్నా..రాజకీయాలకు మాత్రం అతికినట్లు సరిపోతుంది. రాజకీయాల్లో ఎప్పుడు ఏం జరుగుతుందో ఊహించలేం. పరిస్థితులు, సందర్భాలను బట్టి ‘చతురత’ ఉంటే ఎవ్వరైనా ఇక్కడ రాణించవచ్చు. అన్నాడీఎంకే ప్రధాన కార్యదర్శి వీకే శశికళ విషయంలో అదే జరిగింది.
ఓ పన్నీరుసెల్వం తిరుగుబాటు చిన్నమ్మపై తిరుగుబాటు చేయడంతో..అన్నాడీఎంకేలో ‘హార్స్ ట్రేడింగ్’కు తెరలేచింది. తన వర్గ ఎమ్మెల్యేలను కాపాడుకోవడానికి చిన్నమ్మ శశికళ అనుక్షణంగా వైరివర్గాల ఎత్తులకు పైఎత్తులు వేస్తూనే ఉన్నారు.

ఎన్ని ఎత్తులు వేసినా మేజిక్ ఫిగర్ ఏ వర్గంలో ఉంటే..ఎవరికి జైకొడితే వారిదే అధికారం. గత మంగళవారం నుంచి శశికళ వర్గ ఎమ్మెల్యేలు మహాబలిపురం-కువత్తూర్ లోని గోల్డెన్ బే రిసార్ట్స్ లో బస చేస్తున్నారు. ఇందులో కొంతమంది తిన్నగా జారుకొని ఓపీఎస్ కు జైకొట్టారు. అయినా ఇప్పటికైతే చిన్నమ్మ వర్గానిదే మెజార్టీ.

అయితే ఎమ్మెల్యేలు ఎవరిపక్షా ఉంటే, ఎవరిదగ్గరుంటే వారే సీఎం అవుతారు కదా! సీఎం కావాలని పన్నీరు సెల్వం ఒకవైపు...చిన్నమ్మ శశికళ మరోవైపు ఎమ్మెల్యేలను తమవైపు తిప్పుకోవడానికి ప్రయత్నిస్తుంటే...పళనిసామి మాత్రం..మెజార్టీ ఎమ్మెల్యేలు తన గుప్పిట్లో ఉన్నారని ముందు నుంచే ధీమాతో ఉన్నారట. అందుకే ఈ రిసార్ట్స్ యజమాని అయిన యడ్డపడి పళనిస్వామి (గోల్డెన్ బే రిసార్ట్స్ ఇతరుల పేరు మీదున్నా...ఇది పళనిసామిదేనని ప్రచారం జరుగుతోంది) తననే సీఎం చేయాలని ఆదినుంచి అంటున్నట్లు సోషల్ మీడియాలో ప్రచారం జరుగుతోంది. అయితే ఆయన అలా జోక్ చేసినా..నిజంగానే అలా అన్నా...ఇప్పుడు మాత్రం పళనిస్వామినే రిసార్ట్స్ లో ఎమ్మెల్యేలు శాసనసభాపక్ష నేతగా ఎన్నుకున్నారు.

అన్ని కుదిరితే..పళనిస్వామి సీఎం అవుతారు. అలా జరిగితే మాత్రం...ఇద్దరు కొట్లాడితే మధ్యలో వచ్చే మూడోవారికి లాభం అన్నట్లు పళనికి పండగే మరి. సెల్వం..శశికళలు ఎంత కష్టపడినా..దక్కని సీఎం పీఠం..తన దగ్గర ‘దాగిన’ ఎమ్మెల్యేలు..తనకే జై కొట్టడం విశేషమే కదా! అన్నట్లు ఇప్పుడిదే టాపిక్ సోషల్ మీడియాలో వైరల్ అయ్యింది.