గుడ్ న్యూస్: భారత్‌లో ఆక్స్‌ఫర్డ్ టీకా రెండో దశ ట్రయల్స్ ప్రారంభం

భారత్‌లో ఆక్స్‌ఫర్డ్ యూనివర్సిటీ కొవిడ్-19 వ్యాక్సిన్‌ ప్రయోగాలకు సంబంధించి మరో కీలక అడుగు పడింది. టీకా రెండో దశ క్లినికల్ ట్రయల్స్‌ పుణేలోని సీరమ్ ఇనిస్టిట్యూట్ ఆఫ్ ఇండియాలో ప్రారంభమయ్యాయి. భారతీ విద్యాపీఠ్‌ కాలేజీతో పాటు హాస్పిటల్‌లో బుధవారం (ఆగస్టు 26) మధ్యాహ్నం ఒంటి గంటకు ప్రయోగ పరీక్షలు ప్రారంభమైనట్లు సీరమ్ ఇనిస్టిట్యూట్ ప్రతినిధులు తెలిపారు. ప్రయోగాలను విజయవంతంగా పూర్తి చేసి టీకాను అందుబాటులోకి తీసుకురావడానికి ప్రయత్నాలు చేస్తున్నట్లు పేర్కొన్నారు.

భారతీ విద్యాపీఠ్‌‌కు చెందిన ఇద్దరు వాలంటీర్లకు బుధవారం వ్యాక్సిన్ ఇచ్చినట్లు హాస్పిటల్‌కు చెందిన సీనియర్ అధికారి ఒకరు తెలిపారు. వీరిలో 32 ఏళ్ల ఓ యువకుడితో పాటు 48 ఏళ్ల మరో వ్యక్తి ఉన్నట్లు వెల్లడించారు. వాలంటీర్లకు వ్యాక్సిన్ ఇవ్వడానికి ముందు వైద్యులు వారికి కొన్ని పరీక్షలను నిర్వహించినట్లు తెలిపారు.

ఈ ప్రయోగాల కోసం మంగళవారం ఐదుగురు వాలంటీర్లు ముందుకొచ్చినట్లు హాస్పిటల్ వర్గాలు తెలిపాయి. ఈ ఐదుగురికీ కొవిడ్‌ యాంటీబాడీస్‌ పరీక్షలు నిర్వహించగా వారిలో ముగ్గురికి యాంటీబాడీస్‌ పాజిటివ్‌గా వచ్చాయి. దీంతో వారిని క్లినికల్‌ ట్రయల్స్‌ నుంచి తప్పించి మిగిలిన ఇద్దరికే వ్యాక్సిన్ ఇచ్చారు. వారం రోజుల్లో మొత్తం 25 మందికి టీకా ఇవ్వనున్నట్లు చెప్పారు. వీరందరికీ వ్యాక్సిన్ ఇచ్చి ఫలితాలను గమనించనున్నట్లు వివరించారు.

కరోనా వైరస్‌కు చెక్ పెట్టడానికి బ్రిటిష్‌ స్వీడిష్ ఫార్మా కంపెనీ ‘ఆస్ట్రాజెనెకా’ సహకారంతో ఆక్స్‌ఫర్డ్‌ విశ్వవిద్యాలయం ‘కొవిషీల్డ్’ టీకాను అభివృద్ధి చేసింది. భారత్‌లో ఈ వ్యాక్సిన్‌ను ఉత్పత్తి చేసేందుకు పుణేకు చెందిన సీరం ఇనిస్టిట్యూట్‌ ఆఫ్‌ ఇండియా ఒప్పందం చేసుకుంది.

Must Read: కరోనా వైరస్ కొత్త లక్షణం

Also Read: రూ.2000 నోట్లు రద్దు చేస్తున్నారా.. ఆర్బీఐ ఏం చెప్పింది?