రాజ్యసభకు ఇళయరాజా, పీటీ ఉష, రాజమౌళి తండ్రిని నామినేట్ చేసిన కేంద్రం

మ్యూజిక్ మ్యాస్ట్రో ఇళయరాజా, పరుగుల రాణి పీటీ ఉష, దర్శకధీరుడు రాజమౌళి తండ్రి విజయేంద్ర ప్రసాద్‌కు అరుదైన గౌరవం దక్కింది. కేంద్ర ప్రభుత్వం వీరిని రాజ్యసభకు నామినేట్ చేసింది. వీరితో పాటు వీరేంద్ర హెగ్డేను కలిపి మొత్తం నలుగురిని రాజ్యసభకు నామినేట్ చేసింది. రాష్ట్రపతి కోటాలో వీరిని రాజ్యసభకు నామినేట్ చేశారు. ఈ నలుగురు ప్రముఖులూ దక్షిణాదికి చెందిన వారే కావడం విశేషం. కళలు, సామాజిక-సేవతో పాటు వివిధ రంగాల్లో విశేష సేవలు అందించిన వారిని రాష్ట్రపతి కోటాలో రాజ్యసభకు నామినేట్ చేసే వెసులుబాటు రాజ్యాంగం కల్పించింది.

ప్రధాని నరేంద్ర మోదీ స్వయంగా ఈ నలుగురు ప్రముఖులకు ఫోన్ చేసి రాజ్యసభకు నామినేట్ చేసిన విషయాన్ని చెప్పి అభినందనలు తెలిపారు. ఈ మేరకు న్యూస్ ఏజెన్సీ ఏఎన్‌ఐ ట్వీట్ చేసింది. వీరికి అభినందనలు తెలుపుతూ ప్రధాని మోదీ ట్వీట్ చేశారు.

ఇళయరాజా సంగీతం అనేక భావాలకు ప్రతిబింబమని.. అనేక తరాలకు అదో వారధిలా నిలిచిందని ప్రధాని మోదీ కొనియాడారు. పీటీ ఉష జీవితం ప్రతి భారతీయుడికీ ఆదర్శనీయం అన్నారు. ఏళ్లుగా ఆమె ఎందరో క్రీడాకారుల్ని తీర్చిదిద్దారని ప్రశంసలు కురిపించారు. విజయేంద్ర ప్రసాద్ దశాబ్దాలుగా సృజనాత్మక రంగంలో సేవలు అందిస్తున్నారని.. ఆయన సేవలు మన సంస్కృతిని విశ్వవ్యాప్తం చేశాయని కొనియాడారు.

వీరేంద్ర హెగ్డే సామాజిక సేవతో విశేష గుర్తింపు పొందారు. విద్య, ఆరోగ్యం, సంస్కృతి రంగాల్లో కర్ణాటకలో సేవలు అందిస్తున్నారు. ‘ధర్మస్థల ఆలయాన్ని సందర్శించాను. అక్కడ వీరేంద్ర హెగ్డే గొప్ప సేవా కార్యక్రమాలను స్వయంగా వీక్షించాను’ అని మోదీ ట్వీట్ చేశారు.